Nxorën të dhënat e shqiptarëve! Lirohen nga qelia ekspertët e IT dhe përmbaruesit

328
Sigal

Gjykata ka dhënë masën e sigurisë për katër personat e arrestuar për publikimin e listës së pagave të më shumë se 630 mijë qytetarëve shqiptarëve.

Mësohet se për Eni Qirjako është dhënë masa e sigurisë detyrim paraqitje, ndërsa për Andi Agarain, Klodian Sota dhe Endri Ikonomi arrest shtëpie.

Katër punonjësit u arrestuan tre dite me parë nga policia. Eni Qirjako dhe Andi Agaraj janë punonjësit e AKSHI-it, ndërsa Klodian Sota dhe Endri Ikonomi janë dy punonjës të kompanive private që i kanë blerë të dhënat e shqiptarëve nga dy specialistët e IT-së tek Tatimet, që ishin të emëruar edhe pranë AKSH-it.

Në një deklaratë për mediat tre dite me pare drejtuesja e Prokurorisë së Tiranës, Elisabeta Imeraj ka treguar pistat e hetimit ku është përqendruar deri më tani prokuroria për skandalin e publikimit të të dhënave të pagave të qindra mijëra qytetarëve shqiptarë.

“Pista tjetër e hetimit për t’i shkuar deri në fund jo vetëm për personat që kanë poste shtetërore që kanë shfrytëzuar postin e tyre për ti marrë shfrytëzuar apo shitur por edhe për ata njerëz që kanë krijuar aksesin e pasjes së të dhënave”, tha prokurorja.

Organi i akuzës bën me dije se një specialiste e IT te Tatimet mori pagat nga sistemi dhe ia kaloi kolegut të saj të IT, i cili ua shiti subjekteve private. Këta dy të arrestuar ishin punonjës të emëruar pranë AKSHI-t, por ndërkohë puna e tyre bazë ishte si specialistë IT-je tek Drejtoria e Përgjithshme e Tatimeve.

Sipas Imerajt, dy personat që janë punonjës zyrtarë i kanë shitur të dhënat e pagave tek “subjektet private që punojnë në fushën e përmbarimit me agjenci të ndryshme që këto të dhëna i kanë përdorur për qëllime të tyre apo qëllime të tjera”.