“Nuk ka ndryshim të masave”/ Komiteti i Ekspertëve: Ja qytetet ku është konfirmuar varianti Delta

215
Sigal

Komitet Teknik i Ekspertëve doli këtë mesditë në një konferencë urgjente, pas mbërritjes së variantit Delta të koronavirusit në Shqipëri.

Komiteti Teknik i Ekspertëve, në mbledhjen e kësaj të hëne vendosi që masat e vendosura në vend të mos ndryshojnë.

Pavarësisht rastit se një ditë më parë Ministria e Shëndetësisë konfirmoi prezencën e variantit “Delta” të virusit në vend, KT, vlerësoi se masat të mos ndryshohen, reflektuar dhe nga situata epidemiologjike dhe shtrimet në spitale.

Drejtoresha e ISHP, Albana Fico, tha se në laboratorin në Berlin ishin dërguar 21 mostra kimike, të cilat kanë rezultuar pozitive me variantin Delta.

Sipas Ficos, raste me këtë variant të Covid-it janë konfirmuar në qytete si Tirana, Elbasani, Shkodra, Lezha, Kavaja, Gjirokastra, Korça, Peqini, Mati dhe Vlora.

“Ka ardhur përgjigjja nga Berlini për variantin Delta. Dua t’ju sjell në vëmendje situatën epidemiologjike në vend, që ka shënuar disa rritje në raport me incidencën, që është 10 për 100 mijë banorë, mesatarja ditore është rritur, numri total i rasteve rezulton i rritur, numri i bashkive që janë përfshirë nga rastet e reja ka shkuar në 10. Në Infektiv janë të shtruar 9 pacientë, fatmirësisht nuk kemi pasur raste fatalitetesh. Vijojnë të shtohen numrat e personave të vaksinuar me dy dozat e vaksinës.

Sa i përket variantit Delta, dyshimi ynë i arsyeshëm është konfirmuar tashmë. Dërguam 21 mostra kimike, që kanë rezultuar pozitivë. Këto mostra i kemi vënë mënjan për periudhën 1 qershor-12 korrik, kur filluam të shohim sinjalet e pazakonta. E rëndësishme është që këto mostra i kemi gjetur në qytete si Tirana, Elbasani, Shkodra, Lezha, Kavaja, Gjirokastra, Korça, Peqini, Mati dhe Vlora. E gjithë kjo përpjekje ka një vlerë të veçantë, që është vaksinimi i shoqëruar me masat që janë në fuqi dhe që duhen zbatuar nga qytetarët.

Qarkullimi i këtij varianti tregon se ne nuk e kemi përfunduar situatën, ndaj duhet që personat që kanë simptoma, të karantinohen. Të gjithë ata raste që kanë nevojë për ndihmë të shpejtë mjekësore, të telefonojnë në numrin e urgjencës 127”, tha Albana Fico.

Një ditë më parë, Ministria e Shëndetësisë konfirmoi mbërritjen e variantit Delta në vendin tonë, ndërsa ministrja Ogerta Manastirliu iu bëri thirrje qytetarëve që të vaksinohen.