Nga karantina, te ora policore e masat në kufi, Komiteti i Ekspertëve njofton masat e reja anti-covid

225
Sigal

Duke nisur nga data 1 shtator, vendi ynë do të aplikojë masa të reja anti-covid, të cilat janë forcuar për shkak të rritjes së rasteve të infektimeve.

Komiteti Teknik i Ekspertëve vendosi që të ndryshojë orën policore, e cila do të hyjë në fuqi nga 23:00 deri në orën 06:00. Po ashtu, masa të reja do të aplikohen dhe në pikat kufitare të Shqipërisë, ku qytetarët duhet të plotësojnë 3 kushte.

Kështu, kush do të hyjë në kufijtë e territorit shqiptar duhet të këtë pasaportë vaksinimi, test PCR brenda 72 orëve ose provë të kalimit të covid, 6 muaj pas shërimit.

Komiteti Teknik më tej vendosi, bërjen me detyrim të vaksinës për mjekët, studentët dhe mësuesit.

“Komiteti Teknik ka ndjekur me vëmendje dinamikën e COVID-19 në Shqipëri, në Rajon e në Botë. Ajo që është vënë re është që indikatorët në Shqipëri gjatë kësaj jave kanë treguar tendencë përkeqësimi. E kam fjalët për rastet ditore dhe incidencën dy javore.

Duke analizuar më në thellësi shkaqet që çojnë në këtë përkeqësim, komiteti teknik ka marrë vendim për disa masa. Duke filluar nga data 1 shtator, ora policore do të shkojë në 23:00 deri në orën 6:00.

Qytetarët që hynë në Republikën e Shqipërisë duhet të paraqesin tre kushte, të paraqesin certifikatën e vaksinimit. Të kenë testin PCR brenda 72 orëve, ose të kenë provë të kalimit të infeksionit të vlefshme deri në 6 muaj. Fëmijët deri në 6 vjeç nuk i nënshtrohen të tilla rregullave.

Qytetarët rezidentë që nuk kanë këto tre rregulla, duhet të vendosen në karantinë 10 ditore. Komiteti Teknik ka vendosur të detyrueshëm vaksinimin për bluzët e bardha, mësuesit dhe studentët. Përjashtim do të bëhet për ata që kanë indikacion mjekësor për mosbërjen e vaksinës, që do të vlerësohet me përgjegjshmëri.

Për studentët bëjmë thirrje për vaksinim brena muajit shtator, e të lehtësohet ecuria e procesit shëndetësor.

Në Aeroporte do të lejohen të hyjnë pasagjerët që udhëtojnë, duke përjashtuar të afërmit e tyre. Ata duhet të jenë të pajisur me maska.

Mbetet në fuqi urdhri për përdorimin e maskave në ambientet e mbyllura, e në ato vende ku nuk sigurohet distancimi fizik”, tha Rkacolli.