Asnjë prej drejtuesve të emëruar që ushtrojnë funksionin e tyre, nuk do t i shpëtojë “tenderit” të hapur për përzgjedhjen e re
Ndarja e pushteteve dhe posteve drejtuese në rrethe, pakënaqësitë e militantëve, anëtarësisë, kryesisë së degëve, deputetëve dhe opozitës, kanë detyruar kryesinë qendrore të PS të vendosë rregulla të reja dhe të përmbysë gjithçka lidhur me emërimet e deritanishme. Asnjë prej drejtuesve të emëruar dhe përzgjedhur që ushtrojnë funksionin e tyre, nuk do t i shpëtojë “tenderit” të hapur për përzgjedhjen e re, asnjë prej atyre që ka pasur nga baza kontestime, akuza dhe që i janë vërtetuar shkelje ligjore dhe abuzime nuk do të falet. Fakti është se deri tani në rrethet kryesore, PS ka marrë faktikisht rreth 15 për qind më pak poste se LSI, por duke parë afrimin edhe të PDIU dhe FRD, ndoshta ky raport do të thellohet. Në Elbasan, Durrës e Korçë, PS e këtyre rretheve kanë kontestimet e tyre lidhur me emërimet e bëra pas muajit maj 2014, por edhe me praktikat e punësimit të militantëve të tyre. Mbi 2116 kërkesa në këto rrethe nga persona të larguar nga puna gjatë 8 viteve të qeverisjes së PD, presin dhe u luten çdo ditë drejtuesve dhe deputetëve për tu sistemuar. Ngadalësia me të cilën po punohet për punësimin (jo vetëm të militantëve socialistë) i ka bërë njerëzit pesimistë dhe të votuarit rebelë. Rrethet e mëdha po mbyten nga papunësia, ndërkohë që qeveritarët lokalë nuk premtojnë hapjen e vendeve të reja të punës. Elbasani ka aktualisht mbi 17 mijë të papunë, të cilët pas falimentimit të dhjetëra bizneseve, as që kanë shansin të gjejnë një vend pune. Ndërkohë, Zyra e Punësimit, veç ditëve të para të dyndjes me shpresën se do të gjenin oferta nga firmat apo subjektet për zanate, atje tashmë gjithçka ka mbetur në heshtje. Askush nuk troket as për të marrë informacion në sportele. Po ashtu edhe Durrësi, ka pësuar rritje të papunësisë. Mbi 9.500 persona ishin të regjistruar në shtator 2014 si të papunë, ndërkohë që Zyra e Punësimit, pothuajse, çdo javë afishon njoftime për “prurje të reja” nga kompani ndërtuese, prodhuese etj.. Por duke u kthyer te problemi drejtuesve, mësuam se nga fundi dhjetorit 2014, pritet edhe shkarkimi nga detyra i shumicës së drejtuesve. Tenderi do të jetë i hapur, por edhe ekskluzivitet i deputetëve të zonave. Ndër kriteret kryesore që duhet të plotësojnë drejtuesit e rinj, mbeten arsimimi, pastërtia figurës, aftësia profesionale, ndërkohë që, emërimet e bëra janë bërë në kundërshtim me ligjin, kriteret dhe dëshirat e deputetëve të zonave zgjedhore. Drejtuesve të rinj u duhet të bëjnë “mik” tashmë deputetët për të ruajtur vendin e punës, ose për të gjetur një vend tjetër pas largimit. Fakti është se drejtuesit e rinj në pothuajse të gjitha rrethet janë njerëzit më të përfolur, madje ata kanë nisur të akuzohen nga qytetarët, por edhe militantët e partive si njerëz të korruptuar , të lidhur me fije të padukshme, shkelës të ligjeve, barazisë me tenderat, etj.. Mungesa e dakortësisë me deputetët, apo edhe devijimi i tyre nga paktet e bëra me “shefat” duket se kanë nxitur iniciativën dhe kanë vendosur ribërjen e tenderave dhe gjetjen e emrave të rinj për t’i zëvendësuar brenda janarit 2015. Realisht është konstatuar se posti i konsumoi shpejt pushtetarët e rinj, kur mëson nga statistikat se brenda vitit të parë qeverisës janë larguar, qarkulluar e shkarkuar nga detyra mbi 115 persona, duke nisur nga drejtues ndërmarrjesh, apo institucionesh në rrethe, e deri drejtorë drejtorish, pasi u janë zbuluar nga opozita lidhje të dyshimta apo e kaluara e inkriminuar e tyre. Por fakti është se në të gjitha rastet, nuk është kërkuar kurrë “falje” apo nuk ka pasur ndëshkim për autorizuesit e tyre. Përkundrazi të larguarit kanë gjetur “strehë” në skutat e errëta të ndonjë drejtorie tjetër. Roli i deputetëve si tenderues dhe seleksionues për drejtuesit e rinj, mbetet ndoshta shansi i fundit për të ndihmuar dhe rindërtuar imazhin e keq që partitë e koalicionit qeverisës krijuan tek militantët e bazës dhe qytetarët e thjeshtë.
Artur AJAZI