Myftiu i Shkodrës vazhdon të jetë ende duke vijuar betejën me koronavirusin. Betejë të cilën po e zhvillon në një spital të Ankarasë në Turqi. Përmes një postimi në rrjetet sociale, ai ka bashkëndarë me të gjithë miqtë e tij, betejën me virusin, por ka edhe një apel për të gjithe qytetarët, duke i kërkuar që të luten për të dhe për babain e tij, i cili ndodhet në gjendje të rëndë shëndetësore.
Postimi i plotë: Të dashtun të zemrës,
Deri më sot, jam rrethuar nga një pafundësi mesazhesh, urimesh, lutjesh e shkrimesh të ndjera nga çdo cep i botës. Nëpërmjet tyre më keni përcjellë mirësi e bekim, që s’ua kthej dot edhe po të sforcohem deri në kiamet!
Dua t’ju kërkoj ndjesë për pamundësinë time për të kthyer çdo mesazh e lutje, edhe për shkak të gjendjes sime shëndetësore, që nuk shkon sipas dëshirës sime. Është luftë e pandalshme, me të papritura e befasi të çuditshme.
Prandaj, më ndjeni dhe lutuni për mua. Nëse do e kaloj këtë prag, Allahut i qoftë falënderimi! E nëse Ai ka shkruar diçka tjetër, elhamdulilah dhe hallall ju kërkoj!
Në këto momente, lutjet e mia, mendimi dhe krejt përkushtimi im është me Haxhi Babën tim të shtrenjtë, që po lufton shumë më fortë e në zemër të kësaj sprove!
Allahu ju dashtë e ju bekoftë! Imam Muhamed B. Sytari/ Ankara, 19 nëntor 2020
