Ligjet kundër terrorizmit, SHBA përshëndet Shqipërinë e Kosovën

475
Shtetet e Bashkuara të Amerikës kanë përshëndetur ndryshimet ligjore që janë bërë në Ballkanin Perëndimor dhe në Evropë sa i përket luftës kundër terrorizimit.
Pas Samitit të Shtëpisë së Bardhë mbi luftën kundër ekstremizmit të dhunshëm i mbajtur në shkurt në Washington me pjesëmarrje të mbi 60 vendeve, përfshi edhe Shqipërinë e Kosovën, DASH ka përshëndetur vendet të cilat me ndryshimet në legjislacionin e tyre u ndalojnë shtetasve bashkimin në konflikte të armatosura jashtë territorit të vendit.
“Ne përshëndesim partnerët tanë evropianë të cilët kanë përmirësuar ose miratuar ligjet e reja për ndjekjen e luftëtarëve të huaj, duke përfshirë më së fundi ndryshimet në kodin penal të Malit të Zi më 18 mars, pastaj ligjin në Kosovë që u nënshkrua më 25 mars, dhe reformat e reja në Spanjë të miratuara më 26 mars,” thuhet në një deklaratë të Departmentit Amerikan të Shtetit.
Më tej në këtë deklaratë theksohet se Shqipëria, Austria, Azerbajxhani, Bosnjë e Hercegovina, Danimarka, Finlanda, Franca, Italia, Letonia, Maqedonia, Portugalia dhe Serbia gjithashtu kanë nënshkruar apo zbatuar legjislacionin mbi luftëtarët e huaj.
“Tani është e paligjshme në të gjithë Ballkanin Perëndimor që të udhëtosh për të luftuar në një konflikt të huaj ose të bësh rekrutimin apo organizimin dhe financimin për pjesëmarrje të qytetarëve në formacione të huaja ushtarake. Këto përpjekje janë një kontribut i rëndësishëm në strategjinë tonë më të gjerë për të zbutur rrjedhën e luftëtarëve të huaj terroristë, siç diskutua në shkurt në nivel ministrash në Washington,” thuhet në këtë deklaratë.
Shqipërinë në Samitin e Shtëpisë së Bardhë e përfaqësoi ministri i Brendshëm, Saimir Tahiri.
Sigal