KLGJ reagon pas shpëthimit të tritolit mbrëmjen e djeshme: Akte të tilla përbëjnë kërcënim serioz jo vetëm për gjyqtarët, por ndaj gjithë sistemit të drejtësisë

217
Sigal

Mbrëmjen e sotme, Këshilli i Lartë Gjyqësor ka reaguar pas vendosjes së tritolit mbrëmjen e djeshme në makinën e bashkëshortit së gjyqtares Gentiana Muçaj me anë të një njoftimi pë shtyp.

Në njoftimin për shtyp ata u shprehën se, “Akte të tilla të përbëjnë kërcënim serioz jo vetëm për gjyqtarët, por ndaj të gjithë sistemit të drejtësisë e idealeve themelore të një shoqërie të hapur dhe shtetit të së drejtës.”.

Njoftimi i plotë për shtyp nga KLGJ: 

Këshilli i Lartë Gjyqësor shpreh shqetësimin e thellë në lidhje me aktin kriminal të datës 11.3.2021 ndaj anëtarëve të familjes së gjyqtares Gentiana Muçaj dhe dënon me forcë çdo akt që cenon sigurinë e gjyqtarëve.

Akte të tilla të përbëjnë kërcënim serioz jo vetëm për gjyqtarët, por ndaj të gjithë sistemit të drejtësisë e idealeve themelore të një shoqërie të hapur dhe shtetit të së drejtës.

Këshilli i Lartë Gjyqësor i shpreh mbështetjen e palëkundur familjes Muçaj dhe të gjithë anëtarëve të personelit të sistemit gjyqësor për të garantuar sigurinë e tyre, në mënyrë që të jetojnë e të ushtrojnë detyrën pa frikën e kërcënimeve nga armiqtë e drejtësisë.

Këshilli i Lartë Gjyqësor është i gatshëm të bashkëpunojë ngushtë me agjencitë ligjzbatuese për zbulimin e autorëve të akteve të tilla kriminale, me qëllim ndëshkimin e tyre dhe parandalimin e ngjarjeve të tilla të rënda.