Fadromat e Inspektoratit Kombëtar të Mbrojtjes së Territorit kanë nisur shembjen e 10 objekteve në zonën e Radhimës në Vlorë.
Pronarët e objekteve që do shemben, kanë kundërshtuar me forcë prishjen e bizneseve. Ata pretendojnë se janë në proces legalizimi dhe se disponojnë dokumente.
“Dokumentet nuk i njohin ndërkohë që lejen e ndërtimit e kemi marrë në 1994 apo 1998”, tregon një prej pronarëve.
Sipas IKMT prishja e objekteve ka vijuar pasi ato janë ndërtuar pa leje, por një gjë e tillë është kundërshtuar me forcë nga qytetarët.
‘Viktimë’ e aksionit ka rënë dhe një shtetase italiane që ka ardhur për të bërë biznes në Shqipëri.
“Kam bërë kontratën në dhjetor të 2021 për 5 vjet. Noteri bëri kërkimet dhe çdo gjë ishte në rregull. Unë kam paguar taksat çdo muaj, se kuptoj këtë ndërhyrje për të shembur bizneset në prag të sezonit turistik”, shprehet sipërmarrësja italiane.
Që nga nisja e aksionit, 80 objekte pa leje janë shembur përgjatë bregdetit të bashkisë Vlorë.
