Të tjera detaje dalin në dritë nga krimi i rëndë që tronditi Elbasanin, ku burri vrau bashkëshorten e tij. Gruaja kërkonte urdhër mbrojtje nga bashkëshorti, por ish-polici i mori jetën duke e masakruar me thikë dhe qëlluar për vdekje me kallashnikov.
Ngjarja e rëndë që tronditi Elbasanin u shënua mesditën e kësaj të enjteje pranë gjykatës. Bashkëshortët Koço dhe Liljana Buzo përkatësisht 58 dhe 54 vjeç ishin duke iu drejtuar gjykatës se qytetit ku do të mbahej seanca për ish-policin, pasi e shoqja e kishte denoncuar për dhunë dhe kërkonte urdhër mbrojtje ndaj tij.
Veçmas nga njeri-tjetri bashkëshortet ishin duke ecur drejt gjykatës, por 58-vjeçari i cili ishte duke e ndjekur të shoqen e ndaloi atë dhe pas konfliktit verbal që patën e qëlloi me thikë dhe me pas edhe me kallashnikovin që kishte me vetë duke e lënë të vdekur ne vend. Po ashtu te plagosur mbeten edhe dy persona të cilët ndërhynë për të neutralizuar agresorin.
Njërin prej tyre e kapën plumbat në këmbë dhe tjetrin në dorë, të cilët pasi kanë marrë ndihmën mjekësore janë larguar në banesë. Autori i krimit, 58-vjeçari Koço Buzo u arrestua menjëherë pas ngjarjes, ndërsa policia sekuestroi armën e zjarrit tip kallashnikov dhe thikën me të cilën ai qëlloi gruan.
Mësohet se konfliktet mes çiftit kanë qenë të vazhdueshme për motive xhelozie. Ishte kjo edhe arsyeja qe 58-vjeçari Koço Buzo ushtronte dhunë të vazhdueshme ndaj bashkëshortes së tij, e cila kërkonte t’i jepte fund, por burri nuk ndali derisa i mori jetën asaj.
