KLSH mbyll kontrollet në ZRPP Elbasan dhe Durrës. Mbi 1860 certifikata pronësie me probleme ligjore
Kontrolli i Lartë i Shtetit ka mbyllur përfundimisht kontrollet, të cilat zgjatën prej afro 4 muajsh, në degët e ZRPP-së në Elbasan dhe Durrës. Tashmë, pritet vetëm dërgimi raportit përfundimtar në DPZRPP, Ministrinë e Drejtësisë dhe degët në rrethe. Burime nga zyrat vendore të ZRPP-së në rrethet e Elbasanit dhe Durrësit i thanë “Telegraf” se “kontrolli ka gjetur shkelje skandaloze, abuzime dhe veprime, të cilat nuk i falen asnjë zyrtari fillestar dhe jo një regjistruesi me përvojë, pasi janë qindra certifikata pronësie, të cilat kanë paligjshmëri, kanë krijuar përplasje në gjykata dhe problem mes pronarit të vjetër dhe të ri”. Bazuar në denoncimet, kontrollet dhe verifikimet sipas rasteve, KLSH-ja ka konstatuar se prej vitit 2008 deri në qershor 2013, nga ZRPP e Elbasanit dhe Durrësit kanë dalë me parregullsi rreth 1860 certifikata pronësie, veç shkeljeve të rënda ligjore dhe abuzimeve me detyrën nga ish-regjistruesit dhe zyrtarët e tjerë, të cilët pritet të përballen me organet e drejtësisë”. KLSH-ja është ndalur për herën e dytë brenda vitit 2014 në dy hipotekat e Durrësit dhe Elbasanit, pasi situata e trashëguar atje mbetet serioze dhe problematike. Abuzimi me pronat, me detyrën, mbivendosjet dhe shkeljet ligjore kanë detyruar kreun e KLSH-së Bujar Leskaj të rikthejë ekipet e kontrollit, dhe të ndalet seriozisht në propozimet për masat administrative dhe penale ndaj çdo shkaktari. Zonat problematike në Durrës dhe me shumë probleme mbeten plazhi, Kallmi, Rrashbulli, Shkëmbi i Kavajës, zona e Gjirit të Lalëzit, kurse në Elbasan pothuajse të gjitha trojet në pronat e elbasanasve të vjetër dhe kodrat dhe komunat përreth. KLSH-ja, pas hartimit të raportit përfundimtar mbi dy zyrat vendore të ZRPP, ka gati edhe propozimet për masat konkrete administrative dhe penale ndaj 27 personave përgjegjës. Veç dëmit material ndaj palëve, të cilët kanë vite që ndodhen në konflikte të ashpra për të zgjidhur pronësinë pas shkeljeve ligjore, dhe veç abuzimeve me detyrën dhe korrupsionit, 27 zyrtarët do të përballen edhe me akuza të tjera si tjetërsim dhe përvetësim prone etj. Shumë shpejt “Telegraf” do të bëjë publike raport –kontrollin e KLSH-së për dy zyrat e ZRPP-së në Elbasan dhe Durrës, bashkë me evidentimin e shkeljeve ligjore dhe abuzimin që është kryer dhe konstatuar atje në vite.
Ben Delimeta