Falsifikoi vendimin gjyqësor për divorc, Gjykata e Lezhës dënon me 1 vit burg qytetarin

18
Sigal

Gjykata e Lezhës ka dënuar me 1 vit burg një person i cili kishte prodhuar një vendim gjyqësor të falsifikuar. Personi me inicialet A.M u gjet fajtor për veprën penale “Falsikim Dokumentash”, ndërsa çështja penale është hetuar nga prokurori Sabri Kastrati.

Sipas dosjes hetimore, vendimi i falsifikuar ka të bëjë me një çështje divorci, ku në realitet gjyqtari Ilir Përdeda, që ka gjykuar çështjen ka vendosur pushimin e saj, për shkak se nuk ishte paraqitur paditësi.

Gjatë hetimeve, ka rezultuar se paditësi ka marrë një vendim nga gjykata e Lezhës me firmë dhe vulë dhe mandej e ka dorëzuar në Gjendjen Civile në Lezhë, duke kryer dhe zgjidhjen e martesës. Hetimi ka zbuluar se ky vendim i vitit 2019, është tërësisht i falsifikuar, pasi në realitet gjyqtari Përdeda kishte vendosur pushimin e padisë civile dhe jo miratimin e saj.

Në shtator të vitit 2020, prokuroria urdhëroi policinë gjyqësore që të sekuestrojë të gjithë kompjuterit e gjyqtarëve dhe sekretareve por dhe printerat, me qëllim kryerjen e një ekspertimi për të mësuar nëse vendimi gjyqësor i falsifikuar është përpiluar në kompjuterit e gjykatës së Lezhës, por nuk rezultoi diçka e tillë.

I pandehuri ka mohuar në vazhdimësi akuzën e ngritur ndaj tij, ndërsa ka paralajmëruar ankimin të vendimit.