Dhjetëra qytetarë të diasporës që udhëtuan dje drejt Tiranës për të marrë pjesë në protestë janë gjobitur nga policia shqiptare me nga njëqind e dhjetë mijë lekë secili. Sipas protestuesve, gjobat janë vendosur gjatë kthimit nga Tirana drejt pikës kufitare të Muriqanit, me arsyetimin e “pengimit të trafikut” dhe lëvizjes me shpejtësi të ulët në rrugë.
Sot, shumë prej tyre janë përballur me vështirësi në kalimin e kufirit në Muriqan drejt Malit të Zi. Protestuesit pretendojnë se nuk po lejohen të vazhdojnë udhëtimin pasi gjobat nuk janë paguar ende, ndërsa theksojnë se, për shkak se është ditë e diel, nuk kanë mundësi të kryejnë pagesat në kohë.
Në një dokument të shpërndarë nga protestuesit shihet një procesverbal i policisë, ku gjoba është vendosur për shkelje që lidhen me pengimin e qarkullimit rrugor. Protestuesit pretendojnë se masat janë marrë ndaj automjeteve të diasporës që morën pjesë në protestën e djeshme në kryeqytet. Deri tani nuk ka një reagim zyrtar nga autoritetet lidhur me pretendimet për ndalimin e kalimit në kufi për shkak të gjobave të papaguara.
