Një incident i ka ndodhur ditën e djeshme Sekretarit të Përgjithshëm të PS-së, Gramoz Ruçi, i cili ishte duke bërë fushatë në Fier. Ruçi u prit me protesta e tabela nga banorët e Zharrëzës.
Kujtojmë se në muajin shkurt këta banorë marshuan drejt Tiranës dhe kaluan net në qiell të hapur përpara Ministrisë së Energjetikës. Ata ende kërkojnë që të dëmshpërblehen për shkatërrimin e banesave të tyre, të shkatërruara nga Bankers Petroleum. Siç edhe duket, Ruçi është përfshirë në këtë situatë të pakëndshme për të, për shkak se nuk janë dhënë dëmshpërblimet e premtuara.
“Nuk ka vota pa dëmshpërblime”, thuhej në pankarta.
Banorët dhe grevistët e Zharrëzës, pasi udhëtuan mbi 125 kilometra në këmbë, nuk u lejuan që të ngrenë çadra para dyerve të ministrisë.
Edhe pse nuk u lejuan që të ngrenë çadrat, banorët e Zharrëzës protestën e tyre e zhvilluan në qiell të hapur dhe, me sa duket, ata ende nuk kanë hequr dorë nga kauza e tyre.
