Bardhyl Berberi
Pasuria e qytetarëve dhe shtetit e vjedhur nga bandat kriminale politike të pushtetit të kaluar dhe atij aktual, duhet t’u konfiskohen atyre dhe t’u kthehet qytetarëve! Shqipëria asnjëherë nuk do të jetë shtet demokratik dhe ligjor, përderisa nuk dënohen krimet dhe kriminelët, nuk marrin dënimin e merituar oligarkët, vjedhësit e pasurisë së qytetarëve dhe të shtetit! Nga ndërrimi i pushtetit komunist me atë demokrat e deri më sot, vlerësohet se janë vjedhur pasuri dhe para nga qytetarët dhe shteti, dhjetëra e dhjetëra miliardë euro… Kush është dënuar në këtë shtet deri më sot për këto krime, për këtë vjedhje të shekullit, nga bandat politike kriminale në këto 26 vjet në të gjitha nivelet?! Cilit ish-politikan, pushtetar, oligark, kriminel, i është konfiskuar pasuria që e ka vjedhur, uzurpuar ose përvetësuar në mënyrë të paligjshme në këtë shtet?! Këtu si në asnjë shtet tjetër vidhet thesari, banka e shtetit. Drejtori i bankës edhe pse shkarkohet, pas skandalit fiton gjyqin dhe merr qindra milionë lekë dëmshpërblim, a e kuptoni se ku jetojmë…dhe çfarë gjyqtarë kemi nëpërkëmbë?! Çdo qindarkë e kësaj pasurie dihet ku ka përfunduar, vetëm duhet që të ketë vullnet politik dhe transparencë, përgjegjësi qytetare dhe atdhetare, forca demokratike në pushtet dhe kapacitete shtet-ndërtuese, që kjo betejë të shkojë deri në fund, në rrugë ligjore!
Po kush do t`i gjykojë këta hajdutë kur vetë ata që duhet të vendosin drejtësi janë krye hajdutë dhe bashkëpunëtorë me pushtetarët që kanë kryer afera nga më skandalozet. A mund të ndodhë që të mbyllen aferat korruptive të CEZ-it nga prokuroria në një shtet tjetër normal. A mund të vritet një vagon treni me njerëz të pafajshëm siç ndodhi në Gërdec dhe askush nuk përfundoi pas hekurave, madje organizatorët e Gërdecit tunden dhe shkunden me dashnoret e tyre nëpër hotele luksoze, vende ekzotike apo dhe si deputetë në parlament. Tek ne njerëzit më të pandershëm ndajnë drejtësi. Shembuj dhe skandale të gjyqtarëve dhe të prokurorëve ka sa të duash. Duke marrë parasysh se, hajdutët e rinj nuk kanë të drejtë morale dhe kredibilitet t’i dënojnë hajdutët e vjetër, krimet dhe kriminelët e mëparshëm, skena politike duhet të pastrohet sa më parë edhe nga kriminelët dhe hajdutët e sotëm në pushtetin e këtij vendi! Me kërcënimin e Vetingut nuk përfundon përralla me oligarkët, për të cilët është dëshmuar katërçipërisht se kanë qenë në shërbim të interesave të huaj që kanë shitur detin ashtu si Ahmet Zogu shiti Shën Naumin. Koha nuk pret deri në Vitin e Ri, që t’iu japi mundësi hajdutëve të hanë gjelin e detit dhe bakllavanë dhe pastaj t’ia mbathin me avion dhe t`i lenë fotografinë Vetingut. Me këdo që mund të bisedosh askush nuk beson më, se do të arrestohen politikanët hajdutë dhe gjyqtarët dhe prokurorët e korruptuar.
