Një familje me katër anëtarë u shua mëngjesin e sotëm në aksin Levan-Vlorë, pasi u përfshinë në aksident. Përplasja e fortë rezultoi fatale për dy prindërit dhe vajzat e tyre. Viktimat e këtij aksidenti janë Eduart Gushi, 44 vjeç, Silvana Gushi, 33 vjeçe. A. G, 14 vjeçe dhe E.G, 9 vjeçe.
Familja po udhëtonte me mjetin tip “Toyota”. Ndërsa pranë zonës së njohur si “Kripa” më afërsi të qytetit të Vlorës ata u përplasën nga një mjet tjetër.
Bëhet me dije se shkak i këtij aksidenti të rëndë dyshohet të ketë qenë shpejtësia e madhe me të cilën lëvizte mjeti tip “Audi”. Burime nga policia bëjnë me dije se “Audi” dyshohet të ketë qenë me 150 km/h, në momentin që ka goditur nga pas makinën me të cilën udhëtonte familja.
Si pasojë e përplasjes të dy mjetet kanë përfunduar në anë të rrugës, ndërsa makina “Toyota” është shkatërruar plotësisht. Për pasojë është hasur vështirësi për nxjerrjen e trupave nga mjeti.
Sakaq, mjeti “Audi” nga shpejtësia e madhe ka thyer edhe një shtyllë elektrike. Në këtë mjet udhëtonin tre të rinj, të identifikuar si Igli Madani, Fabio Lamaj dhe Glori Selimi, të cilët ndodhen në spitalin e Vlorës jashtë rrezikut për jetën.
