Afera e inceneratorëve/ Jo vetëm Subashi, SPAK merr në pyetje edhe Alqi Bllakon

158
Sigal

Përveç kryebashkiakut të Fierit Armando Subashi, SPAK ka marrë në pyetje gjatë ditës së sotme dhe deputetin socialist Alqi Bllako, lidhur me çështjen e inceneratorëve.

Deputeti Bllako është pyetur në cilësinë e Sekretarit të Përgjithshëm të Ministrisë së Mjedisit, ndërkohë që opozita ka akuzuar se babai i tij ka qenë i punësuar në një prej kompanive të inceneratorëve, duke përfituar më shumë se 10 milionë lekë pagë në muaj.

Vetë Bllako nuk ka komentuar asnjëherë përfshirjen e tij në çështjen e inceneratorëve.

Burime bëjnë me dije se prej më shumë se dy orësh është duke u marrë në pyetje në ambientet e SPAK kreu i Bashkisë së Fierit Armando Subashi, në lidhje me inceneratorin e këtij qyteti.

Mësohet se Subashi ka qenë në SPAK në cilësinë e deklaruesit, dhe nuk ka qenë i shoqëruar nga ndonjë avokat.

Subashi do te pyetet lidhur me proceduarat e koncesionarit nga ana e dy prokurorëve Vladimir Mara dhe Dritan Prençi, të cilët janë duke kryer hetime lidhur me këtë incenerator.

Prokuroria e Posaçme vijon po ashtu hetimet për inceneratorin e Elbasanit, ku përveç ish ministrit Koka dhe dy biznesmenëve, persona të tjerë mund të vihen nën akuzë.

Burime nga struktura antikorrupsion bejnë me dije se SPAK ka marrë në pyetje gjatë kësaj jave edhe disa persona të tjerë, mes të cilëve edhe zyrtarë.

Sipas po të njëjtave burime, mësohet se mes personave të që janë pyetur janë dy punonjës së bashkisë Elbasan si dhe një ish zyrtare e lartë e ministrisë së mjedisit.

Të gjithë personat e pyetuar nga SPAK, kanë pasur poste drejtueses si dhe nuk dihet nëse jane pyetur nën cilësinë e personave nën hetim apo që kanë pasur dijeni lidhur me inceneratorin e Elbasanit.