Polici i Burgjeve i arrestuar në operacionin ‘Porositësi’, Flamur Bejko, ka mohuar deklarimet e vëllezërve Beqiraj që kanë thënë para hetuesve se ai i kishte porositur dhe parapaguar për të vrarë dy persona që e kishin rrahur.
Në dëshminë e tij, Bejko ka treguar se shumën prej 3500 euro ia ka dhënë vëllezërve Beqiraj sepse njëri prej tyre ia ka kërkuar me qëllim për të plotësuar dokumentet e banimit në Greqi.
Një pronar lokali është akuzuar prej vëllezërve Beqiraj se i kanë kërkuar armë për të bërë një vrasje dhe se u ka premtuar që t’u jepte një automatik.
Në ballafaqimin me ta ai ka deklaruar se e akuzonin për arsye se i kishte rrahur të dy dhe përzënë nga lokali sepse kishin bërë sherr dhe kishin tentuar të rrihnin kamerierin e tij.
Ngjarja në fjalë është dëshmuar dhe nga klientët dhe kamerieri.
