Të paktën 137 kilogramë kokainë u kapën nga policia shqiptare, si pjesë e një operacioni të kryer në koordinim me policinë greke dhe me zyrën e DEA-s amerikane në Athinë.
Ky aksion policor mori vëmendjen e mediave shqiptare, greke si dhe atyre italiane.
Mediat fqinje shkruajnë se sasia e lëndës narkotike e llojit kokainë ishte fshehur në disa kontejnerë të ngarkuar me banane.
‘Rrugët e kokainës, 137 kilogramë drogë nga Ekuadori për në Shqipëri’, – kështu e nis titullin e shkrimit media italiaine “ilmessaggero.it” për aksionin antidrogë.
Gjatë këtij operacioni u vunë në pranga shtetasit Ardian Bega, 53 vjeç dhe Altin Myslimhaka, 35 vjeç, të dy banues në Durrës, si dhe u shpall në kërkim shtetasi Gentian Malindi.
Ky i fundit është djali i një avokati të njohur, ndërsa për Policinë e Shtetit nuk është një emër i padëgjuar. Ai rezulton me precedent penal, ndërsa është arrestuar më 8 qershor të 2013 pasi u kap me 500 kg kanabis në kuadër të operacionit ‘Sfida’. /BW
