Schrapel: Shumë politikanë shqiptarë i shohin shpesh si armiq kolegët e tyre të “anës tjetër”
Në një intervistë për Deutsche Vvelle-n drejtori për Shqipërinë i Fondacionit Konrad Adenauer, dr. Thomas Schrapel, flet për situatën politike në vend dhe mesazhet e Konferencës së Berlinit javën e kaluar.
DW: Dr. Schrapel, në opinion tuaj, cilat ishin mesazhet thelbësore, të Konferencës së Berlinit?
Kancelarja Merkel formuloi një nga mesazhet më të rëndësishme: Të gjitha shtetet e Ballkanit Perëndimor kanë mundësi reale për një anëtarësim në BE. Kushtet e anëtarësimit nuk duhet të shihen si pengesë apo barrierë, por si shtysë. Dhe anëtarësimi në BE nuk është projekt për politikanët e këtyre vendeve, përkundrazi, fjala është për qytetarët e tyre, të cilët duan t‘ i përkasin Evropës! Por, problemet me korrupsionin dhe mungesën e shtetit të së drejtës duhet të zgjidhen nga politikanët. Në kuadër të së tërës më bie në sy mesazhi që vendet e Ballkanit Perëndimor luajnë një rol gjithnjë e më të rëndësishëm edhe në këndvështrimin e BE-së në Bruksel.
DW: Duke u fokusuar tek zhvillimet në Shqipëri pas marrjes së statusit kandidat, cilat janë sfidat kryesore të vendit në procesin e integrimit europian?
Këto janë dy pikat të cilat u përmendën tashmë. Qytetarët e Shqipërisë kanë nevojë për më shumë siguri në drejtësi. Ngërҫi nuk qëndron tek mungesa e institucioneve. Ҫështja është që institucionet ekzistuese përkatëse duhet të arrijnë pavarësinë e tyre nga politika. Siguria në drejtësi është një nga kushtet më të rëndësishme që njerëzit ta pranojnë demokracinë si formë shteti. Dhe natyrisht lufta kundër korrupsionit duhet të ҫohet përpara në mënyrë transparente dhe të qëndrueshme. Duhet të ketë patjetër pasoja për këdo, i cili do mund të provohej i korruptuar.
DW: Vendimi pozitiv nga Brukseli ende nuk ka ndonjë impakt në përmirësimin e dialogut dhe të bashkëpunimit mes partive politike, megjithëse kjo është kërkuar në mënyrë të vazhdueshme nga komuniteti ndërkombëtar. Duke qenë një njeri i mirinformuar me zhvillimet në Shqipëri Dr. Schrapel, si e shikoni këtë aspekt?
Që të jem i ndershëm, nuk jam i sigurt se ҫfarë nënkuptohet me “dialog dhe bashkëpunim mes partive”. Është e vërtetë që kultura politike, pra sjellja e përditshme me politikanët “e anës tjetër” këtu në Shqipëri nuk bëhet ashtu siҫ ne e njohim të kryhet në Evropën Qendrore ose në Gjermani. Shumë politikanë shqiptarë i shohin shpesh si armiq kolegët e tyre të “anës tjetër”. Ndërkohë që ata janë konkurrentë të zgjedhur në mënyrë demokratike. Po ashtu do doja të theksoja që kemi të bëjmë me një demokraci parlamentare. Ҫka do të thotë që ka parti me përgjegjësi qeverisjeje dhe një opozitë. Ky ndryshim pozicionesh ruhet në demokraci. Opozita është aty për të kritikuar punën e qeverisë. Kjo bëhet më së miri përmes diskutimeve me përmbajtje. Opozita nuk është aty që të vlerësojë pozitivisht veprimet e qeverisë përmes dialogut apo bashkëpunimit. Kjo nuk ndodh as në Gjermani. Personalisht s’ më duket të jetë kjo temë problemi kryesor i demokracisë në Shqipëri!
DVv: Në konferencën në Berlin mes çështjeve kryesore që u theksua ishte edhe forcimi i sistemit të drejtësisë në vendet e Ballkanit Perëndimor. Aktualisht Shqipëria është e përfshirë në diskutimin për zbatimin e reformës në drejtësi. Sa i rëndësishëm është ky proces në opinionin tuaj?
Thomas Schrapel: Së pari duhet të shohim së çfarë nënkuptohet saktësisht me “reformën në drejtësi”. Siguria në drejtësi duhet të garantohet për çdo qytetar të Shqipërisë. Çdo gjë që shërben për ta implementuar atë duhet të mbështetet. Por reforma e drejtësisë në radhë të parë, në këndvështrimin tim, s’ duhet të verë në pikëpyetje institucionet ekzistuese të shtetit të së drejtës.
