Kambana
Të gjithë hodhëm nga një dorë
në derdhjen e kambanës
Na duhej një shembull
Shtuam dhe metale të
tjerë në tunxhin e saj
Dhe zëra nga tanët
Dhe nuk e kuptuam
ç’zgavër lamë bosh
në laringun e saj metalik
Kumbim kambane
nuk patëm kurrë
Zëra të ngjirrur
Grahma gurmazi të çarë
Mbi një pirg të
vdekurish harruar..
Violina dhe harku…
Violina me harkun shaluar
Është një grua seksi
Këndon,
Vajton
e klith në mijra zëra
Harku mashkullor
I lodhur
bie
Gjer te tingulli i fundit.
Përsëri violina
mbetet e virgjër
E përsëri pret
Vuan
Hesht.
Frigorifer
Kanë zënë brymë
Të gjithë demonët e dashurisë
në frigoriferin tim
Dhe buzët dhe puthjet.
Të detyruar jemi
Orë e çast t’i falemi
tiranisë së dimrit që
Me mirkuptim
po na i merr të gjitha stinët.
Bula djerse çelin
limonatat e ftohta
Dhe mollët.
Me akull është mbuluar mishi
Në katin e sipërm.
Vdiq nga torturat
Pjeshka me pushin në faqe.
Plasi një shishe birre
E harruar.
Zgjatemi nëpër katet e borës
Sadopak Dimrin ta zbutim
Me frymën e duarve tona
