Bardhyl Londos
-Po iki, the -shpërndajeni!
O zot, kaq e thjeshtë është ikja,
Kaq e papritur dhe e pashpirt,
Kaq e shpejtë e tinzare?!
Jo, jo, kjo s’është shaka,
Se, është ikje për fare,
Këto janë ikje të mëdha!
Na e plase ndër sy të malluar,
Si në qiell të thatë një rrufe,
E unë mbeta i hutuar,
I befasuar e pa fare zë,
Se, andej nga ikën, s’vjen më!
Jo, jo, kjo s’është shaka,
Se, është ikje për fare
Këto janë ikje të mëdha!
Kjo, që sapo the,
S’është si ikja e një gjethe,
Që bie prej erës përdhe!
E njëjta gjurmë
s’përsëritet dy herë
Poetit Izet Shehu
Pak herë e kam takuar
Ëndrrën tënde,
Në sytë e mi dhe zërin tënd,
Të ngrohtë si puhizë ere,
E tashmë më duhet të takoj
Përherë lotin tim
Të rrjedhë në pikat e shiut
Të dashurisë sate,
Që e kërkoj e më s’e gjej.
Pak herë i pata takuar
Sytë e tu miqësor,
Që lëshonin shkëndija gëzimi,
Si prej folezave
Të shpirtrave, yjet,
Dhe ende ndjej të kem
Dritë prej tyre,
Të shikoj më mirë
Rrugët ku eci tani,
Dhe të fal vetëm dashuri.