DËNIMI
Një thes flori vodhi Taku .
Një thes kashte – Çakmak Xhaku.
Në qeli po vuan dënimin
Çakmak Xhaku – Taku jashtë ,
Se ai që dha vendimin
S’qe gomar , të hante kashtë .
Ç’TË HEDHËSH , DO TË PRESËSH
Kau i tha kalit pa pritur ,
Me tallje , pa turp e cipë :
“-Si t’ja bëj o mëndjendritur ,
m’u krrimb plot, një thes me kripë ?! ”
Foli kali gjithë serbes :
” – Si them unë bëj , jo ndryshe ,
spërkat kripën çdo mëngjes
veç me qumësht dallëndyshe . ”
FTESË FEJZBUKJANE
“-Mbes’ e zhuzhakut, gjinkalla ,
Prej soj të babit, nga halla,
Ashtu shtruar pjano-pjano ,
Mbaroi shkollën për soprano .
Zërin e saj të pa parë
Ndër koncerte e fejzbuke ,
Pasuar nga kërcimtarë
Të kompleksit me pleshtuke
Doni llai që ta dëgjoni ?
Ju ftojmë të urdhëroni
Fejzbukjane e të tjerë ,
Poshtë shtogut , përmbi ferrë .”
ZEMËRZHURITUR
Fati që kurrë s’i ndriti
E la krejt zemërzhuritur ,
Kur humbi brenda një viti
Gruan dhe lopën papritur .
S’i kushdo tjetër në jetë
Qau ai,si çdo njeri ,
Gruan me lotë të fshehtë
Dhe lopën me logori .
Gjithkush I thoshte “- Të dua ,
(pranë kishte gjithë botën)
ç’pret më ? Të kam gjetur grua ! ”
Dhe askush s’i gjeti lopën .
RINOVIMI
I tha gomçja gomaricës
Ndenë trarët e plevicës :
“-Dëgjo ç’të kërkon kjo gojë
të m’i bësh flokët me bojë ,
shpinë e bark qime për qime
të rinovoj veten time !”
Kur dëgjoi ç’i pat kërkuar
Të shoqes ky i uruar ,
I zoti, me dru e sharrë ,
I rinoi gomçes samarë .
METAMORFOZA E GRUAS
Tha Tiku : “-Kur biem në shtrat,
Gruan time sa një gogël,
E përkëdhel gjithë takt,
Zemra ime, zoçk’ e vogël !
Dhe,kur shtrirë gjer e gjatë,
Mbi dyshekun, bërë gropë,
I them me dy orë natë,
Çou,mjaft fjete moj lopë !
Gruaja,zoçkë njëqind gram,
U gëdhi hipopotam .
ANKIMI I PESHKUT
Foli peshku, u ankua :
“-Nëpër gojë nat’e ditë,
ç’ke moj drejtësi me mua
që më vërtit si mastikë ?!
Mua pa xhep, dhëmbë e duar
Ka këtu edhe motmoti ,
po kërkon moj e uruar
të më ndëshkosh kot së koti ?
Pse më ngarkon si mbipeshë
mëkatë ujqsh, peshkaqenësh,
krokodilësh, gollomeshësh,
monstrash e turli legenësh ?! ”
SURPRIZA ASTRONOMIKE
Dëgjo surprizën e radhës ,
Me të bujshmen e ditës :
“-Vajza e ministre Bardhës
dhe e biznesmeni Kitës ,
Pa i bërë askush prita
sillet me flatrat në erë ,
e zhvendosur nga orbita ,
rreth planeteve të tjerë .
FiTiMTARËT
Duke u grrindur e sharë
Për një hu gardhi të thatë
Keq u rrahën dy fshatarë
Me shkopinj thane të gjatë.
Duke ngrënë ç’pat në arë
Te ata, përpara syve,
Dolën vetëm fitimtare,
Dy gomerët e të dyve .
URA ELEKTORALE
Kur të përroi i mallkuar
Urinoi reja e vetmuar ,
Përlau ballë kryevalë
Veç urën elektorale
Për ta rindërtuar prapë
Në thatësirë e vapë
Zorraxhinjtë e thithlopat
Të kërrejnë sërish votat .
