1-
Përse më bën të dridhem moj shejtane
Si thellë toka dridhet nga tërmetet?!
Në syt’ e tu të kaltër mbyt oqeane.
Përse më bën të dridhem moj shejtane?
Syt’ e tu të bukur Hane – Hane,
Qiell i kaltër brenda tyre tretet.
Përse më bën të dridhem moj shejtane
Si thellë toka dridhet nga tërmetet?!
2-
Moj vetullkurorë rritur ndër lëndina,
Konxh’ e trëndafilit, spërkitur me vesë,
Në beben e syrit u kreh vetëtima
Moj vetullkurorë rritur nder lendina.
Flokëve të tua, ndehur shkrepëtima
Dhe nëpër qerpikë, balluket e resë.
Moj vetullkurorë rritur ndër lëndina
Konxh’ e trëndafilit , spërkitur me vese.
3-
Befas krejt papritur çasti përcëllimë
Më shtiu të trembur e më dha të dridhur,
E më bëri gjëmën, më bëri magjinë,
Befas krejt papritur, çasti përcëllimë.
Qëkur fat’ i sertë më shtyu në grreminë,
Gjaku i shpërbërë më mori të hidhur,
Befas krejt papritur çasti përcëllimë
Më shtiu të trembur e më dha të dridhur.