Humoristike
Tash kur po vjen fundi, kur po afrojn` provimet
M’u thartuan trutë nga super-studimet!
Nga super-studimet, një shkollë – një jetë
As hapa, as mbylla te librat një fletë.
Edhe kam besimin, ndër shokët i pari,
Do t`i marr provimet me medalje ari.
Ju lutem dëgjoni, pa u mbajtur rëndë,
Përgatitjen time bërë në çdo lëndë:
….
Pa ia prekur kurrë letërsisë fletët,
Po mallkoj shkrimtarët, po mallkoj poetët,
Ç`janë e ku s`janë, të rinj e të vjetër,
Me vargjet klasikë, vargjet kilometër,
Kë më shkon përbri, kush më del përpara,
Iu harroftë emri, mos i mbiftë fara!
Prapë nuk mërzitem, të dal` ku të dalë,
Çfarëdo të më bjerë, do broçkollit ca fjalë.
…
Sa për historinë, unë që dua paqe,
Bashkë kur u ndamë si Milua në faqe,
Putha atë skile dhe e lashë vetëm,
Se s`kam dashur luftëra, kurrë tërë jetën.
…
Miss gjeografinë, oh sa ma ka ënda
Të flas gjer’ e gjatë për ç`më shkeli këmba,
Për ç`më dëgjoi veshi, për ç`më kap vështrimi,
Për malet, lumenjtë me ujë burimi.
…
Eh matematikën, me qejf e dëshirë
Të na nxjerrë frikën, e marrim me të mirë,
Se për një ushtrim a për një problemë
Na fut në mendime, na shtie dilemë.
Unë ndaj kësaj, bindshëm do fitoj,
Në s`mundem përballë, ndryshe do kopjoj.
Krahë e pëllëmbë, larë si në lavazh
T`i mbush me formula, plot me tatuazh.
Edhe gjithë xhepat e xhekes së vjetër
Do t’i mbush me kopje, plot me copa letër.
…
Kush tha, prej fizikës, më ka hyrë frika?!
I marrsha të keqen, ah më rëntë pika!
Ku ka më të bukur, e them ashiqare,
Me ato formula që s`më hyjnë fare
Por as që më dalin, si prej tokës bima,
Se kafkën e kokës e kam krejt pa vrima.
…
Për biologjinë e lashë anglishten.
Po mësoj përmendësh vetëm latinishten.
Dhe për pakëz fjalë PINUS dhe PINEA
Braktisa i ngrati gjithë gjuhët e reja.
…
Gjithë ato formula, ç`m`i paske me huqe
Moj kimi e dashur, ti moj pispiruqe,
Me ato acide, kripëra e atome
Më dogje moj mike, më sose kufomë;
Ndaj të qëndroj larg, druhem, moj firare
Se mos më mbarosh,t ë më zhdukësh fare!
…
Nëse asnjë libër s`po hap e s`po mbyll,
I maturës sime jam një super-yll.
Me ju profesorë, porsi trim i rrallë
Gati jam të ndeshem, troç e ballë për ballë.
Juve që më quajtët mua “Mendje-fugë!”,
Do t`ju lë pa punë, do t`ju flak në rrugë!
Me këto mësime, të gjitha për vete,
Do marr me patjetër shtatë fakultete;
Shtatë fakultete-shtatë medalje ari
Nga mbipesh` e tyre do prishet kandari.
Dhe tituj shkencorë nga tre për çdo ditë,
Të gjitha me hak, asnjë pa meritë.
…
Nuk ua mbush syrin për ç`më thotë goja?!
Janë prej vërteti, nuk janë prej gjoja.
Veç për sa ju thashë, ju mos më braktisni,
Kur më buzëqeshni, pse s`më duartrokisni?!