Televizioni shtetëror zviceran “Shvajcer Fernzehen” i ka kushtuar një portret kapitenit të Shqipërisë, Lorik Cana, në prag të supersfidës Zvicër-Shqipëri, takim që të luhet të martën në Lucernë. Sipas televizionit zviceran, askush më më mirë se kushdo tjetër mund të reflektojë fuqitë e Shqipërisë dhe ky është kapiteni Lorik Cana, i cili në të kaluarën e tij ka luajtur në Zvicër. Shkrimi ilustrohet edhe më një foto, ku Lorik Cana paraqitet në një duel me yllin portugez, Kristiano Ronaldo. “Është goxha mirë që, shqiptari Lorik Cana, gjatë përgatitjeve për ndeshjen kualifikuese të Botërorit 2014, Zvicër-Shqipëri, kujton episode nga rinia e tij. Mesfushori 29-vjeçar i Lacios së Romës ka luajtur nga viti 1997 deri në vitin 2000 me të rinjtë e Lozanës”, – shkruan “Shvajcer Fernzehen”.
NGA LOZANA NË PARIS
Nga mosha gjashtë deri në 16 vjeç, Cana jetoi së bashku me familjen e tij nga Kosova, si emigrant në komunën e Sheso-syr-Lozanë. Teksa Paris Sën Zhermeni tregoi interes për të, atëherë Cana mori pasaportë franceze dhe tërhoqi në vitin 2000 dhe familjen e tij për në metropolin francez.
DEBUTIMI KUNDËR ZVICRËS
Në vitin 2002 Cana debutoi me ekipin e parë të Paris Sën Zhermenit, dhe vetëm disa muaj më pas, ai mori ftesë nga Kombëtarja e Shqipërisë. Rasti e solli, që debutimi i Canës të përkonte me një ndeshje kundër Zvicrës, pikërisht më 11 qershor 2003, në kualifikueset e Europianit, në Gjenevë, një ndeshje e përfunduar 3-2.
TRANSFERIMET NDËRKOMBËTARE
Me kalimin e viteve Cana u rrit si futbollist dhe u bë një lojtar i Kombëtares, por dhe të dilte në arenën ndërkombëtare. Në vitin 2005, Loriku u transferua nga Paris Sën Zhermeni te Olimpiku i Marsejës, ku mesfushori luftarak u bë kapiten. Më pas, destinacioni ishte Sandërlendi në Angli dhe Gallatasaraji në Turqi. Pas Stambollit, Cana u stacionua në vitin 2011 në kryeqytetin italian, tek Lacio e Romës.
NJË MAL ME TË VERDHA
Cana luan si një mesfushor i vërtetë me numrin gjashtë, pra shkatërrues, por ai mund ta bëjë shumë mirë edhe rolin e një qendërmbrojtësi. Stili i lojës së tij është shumë luftarak dhe e bën të dashur për tifozët. Luan me shumë pasion dhe pa kompromis me kundërshtarin. Gjatë karrierës së tij ai ka shënuar 12 gola, e ka lënë fushën 7 herë dhe ka marrë më shumë se 100 kartonë të verdhë.
PATRIOT I MADH
Ngjyrat e vendit të tij i japin një pasion të veçantë, dhe kjo e nxit atë të japë dhe të bëj gjithçka, qoftë në fushë, por dhe në formën e tatuazheve. Pranë shqiponjës dykrenare qëndron e shkruar në trupin e Canës edhe një pjesë e himnit shqiptar. Zviceranët do të përballen me këtë simbol të ekipit shqiptar, që nuk bën kurrë kompromis me veten dhe jep gjithçka, dhe, këtë e tregoi edhe në ndeshjen e së premtes, në fitoren 3-1 ndaj Qipros, ku Cana ishte më i miri në fushë.
________________________________________________
KOSOVARËT E SHQIPËRISË
Lorik Cana
Është lindur në Prishtinë, më 27 korrik 1983. Aktualisht luan me Lacion, në Itali. 60 ndeshje dhe 1 gol me Kombëtaren.
Samir Ujkani
Është lindur në Vuçitern, më 5 korrik 1988. Aktualisht luan me Palermon, në Itali. 16 ndeshje me Kombëtaren.
Etrit Berisha
lindur në Prishtinë, më 10 mars 1989. Aktualisht luan me Kalmarin, në Suedi. 2 ndeshje me Kombëtaren.
Mërgim Mavraj
Është lindur në Hanau të Gjermanisë, më 9 qershor 1986. Luan me Grojther Fyrth, në Gjermani. 4 ndeshje me Kombëtaren.
Armend Dallku
Është lindur në Prishtinë, më 16 qershor 1983. Luan me Vorskla Poltavën, në Ukrainë. 56 ndeshje, 2 gola me Kombëtaren.
Alban Meha
Është lindur në Mitrovicë, më 26 prill 1986. Luan me Padebornin, në Gjermani, Bundesliga 2. 1 ndeshje me Kombëtaren.
Burim Kukeli
Është lindur në Gjakovë, më 16 prill 1984. Luan me Cyrihun, në Zvicër. 1 ndeshje me Kombëtaren.
Ahmed Januzi
Është lindur në Vuçiternë, më 8 korrik 1988. Luan me Vorskla Poltavën, në Ukrainën. 4 ndeshje me Kombëtaren.
_______________________
ZVICRA
Themelimi si federatë: 1904
Renditja në FIFA: 20
Finale Botërori: 9
Trajner: Otmar Hitzfeld
_________________________
SHQIPËRIA
Themelimi si federatë: 1930
Renditja në FIFA: 84
Finale Botërori: 0
Trajner: Xhani De Biazi
____________________________
BILANCI ME ZVICRËN
4 ndeshje; 0 fitore, 1 barazime, 3 humbje, golat: 4-7
11/04/1965 Tiranë: Shqipëri-Zvicër 0-2
02/05/1965 Gjenevë: Zvicër-Shqipëri 1-0
12/10/2002 Tiranë: Shqipëri-Zvicër 1-1
11/06/2003 Gjenevë: Zvicër-Shqipëri 3-2