Dje, në konferencën për shtyp, nga Kombëtarja kanë folur dy futbollistë, mbrojtësi Aliji dhe mesfushori Ramadani. Duke qenë se në Kombëtare vjen për herë të parë, 21-vjeçari nga Ferizaj, Ylber Ramadani, ka falënderuar trajnerin për besimin, por ai ka folur edhe për trajnerin Sormani, i cili e afroi te skuadra daneze e Veljes, ku ai po luan aktualisht. “Konkurrenca këtu është e madhe, dhe kjo është gjë e mirë. Ende nuk është vendosur se kush luan, por më vjen mirë nëse do të luaj që nga minuta e parë, dhe do të bëj më të mirën”, kështu theksoi Ramadani dje në konferencën për shtyp, ku më pas ka falënderuar trajnerin Sormani, i cili e ka marrë në Danimarkë në skuadrën Vleje që ai e drejton. “Më ka ndihmuar shumë aventura në Danimarkë, trajneri Sormani punon shumë me mua dhe më ka ndihmuar, ndaj edhe falënderoj. Pak a shumë janë të ngjashme, Sormani me Panuçin”. Ndërsa mbrojtësi Aliji e sheh si mundësi të mirë për vijimësinë në ekipin kombëtar të futbollit, ndërsa ndjehet në formë të tregojë veten në ekipin Kombëtar.
