Sot, skënderbeu dhe Laçi për superkupën e Shqipërisë

55
Sot në orën 20:00 në stadiumin Kombëtar “Qemal Stafa” do të luhet finalja e superkupës së Shqipërisë, ku përballë do të jenë Skënderbeu dhe Laçi. Skuadra korçare luan finalen e pestë radhazi të superkupës dhe të dytën përballë Laçit. Dy vite më parë, ujqërit e dëborës fitonin nga llotaria e 11-metërshave përballë kurbinasve, teksa sot duket se do ta kenë mjaft të lehtë përballlë ish-skuadrës së Armando Cungut. Laçi vjen në këtë betejë me një tranjer të ri, me një grup lojtarësh të rinj dhe me një paraqitje mjaft të dobët në Europa Ligë, ku u eliminua që në turin e parë të eliminatoreve, edhe pse merrte pjesë në këtë kompeticion si fituese Kupës së Republikës (mundi në finale Kukësit me rezultatin 2-1). Skënderbeu nga krahu tjetër ka bërë një paraqitje të shkëlqyer në Ligën e Kampionëve duke mbërritur 1 hap larg fazës së grupeve dhe pengesa në këtë drejtim quhet Dinamo e Zagrebit (Me kampionët e Kroacisë Skënderbeu do të përballet javën e ardhshme).
Djemtë e Mirel Josës pritet të zbresin në fushë me një formacion shumë të ngjashëm me atë të sezonit të shkuar, duke qenë të siguritë se do mjaftojë vetëm pak sforco për të mbërritur tek trofeu i parë sezonal. Me korçarët këtë javë është stërvitur dhe Andi Lila. Anësori i djathtë i kombëtares shqiptare akutalisht është pa skuadër dhe ashtu si edhe sulmuesi Hamdi Salihi në pritje të një sistemimi i bashkohen kauzës së ujqërve të dëborës. Por për të dy lojtarët ndenja në Korçë duket një utopi, teksa për Andi Lilën vështirë do të jetë dhe zbritja në fushë gjatë ditës së sotme.
Finalja e superkupës ashtu siç është bërë rit, tashmë do të luhet në Tiranë. Policia e kryeqytetit, bëjnë të ditur burime të ATSH-së, shumë shpejtë do të dalë me një komunikatë zyrtare lidhur me masat që do të marrë për të siguruar rendin dhe sigurinë përpara, gjatë dhe në fund të takimit. Siç është vëzhguar nga ATSH, tek sheshi “Italia”, ku është dhe hyrja për në sektorin e tribunës qendrore të impiantit ku do të luhet finalja është bllokuar qarkullimi i automjeteve. Teksa një gjë e tillë pritet të bëhet rreth orës 18:00 rreth e përqark të gjithë stadiumit.