Rekorde Kombëtare që në nisje, Xhemollari e Meça, dy “fluturat”e ditës së parë

1642
Sigal

Nga Agron KAJA

NOT-KAMPIONATI KOMBËTAR I FËMIJËVE/ Dje në Akuadromin e Tiranës, mbi 200 fëmijë nga e gjithë Shqipëria e zhurmuan pishinën 50 m, u arritën rezultate të larta. Reshjet e shiut shtynë garat

Pasi u mbyllën me sukses në mesin e këtij muaji garat e veprimtarisë ndërkombëtare “Kupa e Teutës 2018”, dje në Akuadromin e Tiranës nisën garat e ditës së parë të Kampionatit Kombëtar të Fëmijëve, të moshës deri në 14 vjeç, meshkuj e femra. Le të themi së pari se, duhen veçuar masat e mira organizative që FSHN-ja kishte marrë për këtë veprimtari kombëtare, ku gjithçka ishte në perfeksionin e duhur. Të pranishëm ishin edhe qytetarë të ndryshëm, të afërm të notarëve garues, por që në shkallët e Akuadromit, sollën një atmosferë të bukur “tifozerie” gjatë zhvillimit të garave. Në këtë kampionat morën pjesë 12 ekipe nga e gjithë Shqipëria, të cilët futën në gara mbi 200 notarë, meshkuj e femra. Që në garën e parë të këtij eventi, u thyen 3 Rekorde Kombëtare nga femrat në 400 m stil i lirë. Vivian Xhemollari e Traditës në Kategorinë B, dhe Kaltra Meça e AN Te Stela në Kategorinë C, ishin dy rekordmenet e para të Kampionatit, madje me përmirësime në kohë të ndjeshme. Xhemollari e thye rekordin në garën 400 m stil i lirë me 11.38, një kohë e ndjeshme kjo, e cila tregoi më së shumti se notarja e ekipit Tradita, në këtë kampionat do të jetë protagoniste edhe me rekorde. Madje që dje, edhe pse garoi jashtë gare në 200 m stil flutur, Vivian Xhemollari e thye rekordin Kombëtar me 07.08 sekonda. Vëmendje dje morri edhe notarja e AN Te Stela, Kaltra Meça, e cila në Kategorinë C për ferma, në garën 400 m stil i lirë e thye Rekordin Kombëtar me 10.39 sekonda. Në garat e paradites, këto ishin rekordet kombëtare që u thyen nga notaret femra, ndërsa pritej që në garat e pasdites të kishte rezultate të larta dhe rekorde të tjerë kombëtarë, por moti me reshje shiu, dhe i ftohtë në raport me stinën, i detyroi drejtuesit e Federatës Shqiptare të Notit që ta shtyjnë ditën e dytë të garave. Referuar kalendarit vjetor kombëtar, garat e Kampionatit Kombëtar për Fëmijë (dita e dytë), do të zhvillohen më 11 korrik 2018, një ditë para nisjes të Kampionatit Kombëtar për të Rinj, të Rritur e veteranë, i cili do ti zhvillojë garat në pishinën 50 m te Akuadromi i Tiranës, në datat 12-13 korrik 2018.

Vivian Xhemollari e Traditës në Kategorinë B, dhe Kaltra Meça e AN Te Stela në Kategorinë C, ishin dy rekordmenet e para të Kampionatit, madje me përmirësime në kohë të ndjeshme

Flet rekordmenia Vivian Xhemollari: Jam e përgatitur për rekorde

Notarja e ekipit Tradita, Vivian Xhemollari, dje ishte rekordmenia e parë në garën 400 m stil i lirë, për femrat Kategoria B. Pas garës, për gazetën “Telegraf”, Xhemollari tregoi se në këtë veprimtari ka ardhur me synime konkrete. “Unë jam e lumtur që këtë Kampionat Kombëtar e nisa me thyerjen e dy rekordeve Kombëtare. Me trajnerin tim (babain) Bernard Xhemollari, unë jam përgatitur që në këtë veprimtari të përmirësoj kohët e mia e më pas të thyej rekordet në të gjitha garat që do të marr pjesë”, kështu deklaroi notarja e Traditës, e cila për këtë vit ka edhe një synim të ri: Në muajin shtator” të këtij viti, unë do të marr pjesë në veprimtarinë ndërkombëtare në Malin e Zi, dhe aty mendoj që të arrij kohë më të mira se këtu, sa i përket garimit në pishinë 50m”. Nëse garat e këtij Kampionati nuk do të ndërpriteshin për shkak të motit me reshje shiu, Xhemollari do të na jepte të tjera kohë rekord në garat e saj.

EKIPET PJESËMARRËSE

Ekipet             Trajnerët       

  1. Te Stela Sadik Mema
  2. Tirana Arian Fetishaj
  3. Teuta Jurgen Fici
  4. Butrinti Stefan Shendi
  5. Uillson Sulejman Poda
  6. Tradita Aleks Gjini
  7. SHSU Gentian Lama
  8. Partizani Dash Bregu
  9. TDS Shpëtim Hoxha
  10. Vlora Not Tomorr Dano