Kreu i KOKSH Viron Bezhani: Kjo federatë është model i cilësisë dhe masivitetit
Viron Bezhani: Kjo federatë ka ecuri të mirë në cilësi dhe masivitet
I pranishëm në ceremoninë e hapjes së Kampionatit Kombëtar të të rriturve dhe të rinjve të notit, presidenti i Komitetit Olimpik Kombëtar Shqiptar, Viron Bezhani, është shprehur me superlativa për atë punë që ndërton prej vitesh Federata Shqiptare e Notit me president Agim Çirakun. I pari i sportit shqiptar nuk është hera e parë që gjendet në aktivitete të sporteve të ujit, sepse, për së fundi, sapo është kthyer nga Lojërat Olimpike Evropiane të Minskut, ku ka qenë i pranishëm në Kampionatin Kombëtar të fëmijëve më 26-27 qershor. Ja dhe përshtypja e tij për kampionatin kombëtar të të rriturve dhe të rinjve. “Përshtypja e Komitetit Olimpik Kombëtar Shqiptar për këtë kampionat, por dhe për këtë Federatë, është me të vërtetë shumë e mirë, sepse kjo Federatë, nga gara në garë, po e tregon rritjen e saj. Po tregon se po punon seriozisht dhe kjo është edhe dëshira jonë që të marrim më të mirën nga këto notarë. Nuk duhet të harrojmë që brenda një viti janë thyer kushedi sa rekorde. Janë gjithë ato veprimtari që kjo Federatë, nga aktiviteti në aktivitet, ështe duke korrur suksese. Është një nga Federatat parësore dhe në Lojërat Olimpike, pavarësisht se më ftesë, ka treguar se gjithmonë rezultatet e saj janë në rritje. Kjo është dhe dëshira jonë për arsye sepse ne nuk shohim këtu vetëm cilësinë, por shohim dhe një masivitet të madh, një pjesëmarrje të madhe të fëmijëve, që është gjëja më parësore në sport. Nuk më ngelet gjë tjetër veçse t’i falënderoj. Falënderoj Federatën, Presidentin për punën e shkëlqyer që po bëjnë”, ka theksuar Bezhani, ndërsa sporti i notit është gjithnjë i pranishëm në aktivitetet ndërkombëtar që Komiteti Olimpik Kombëtar Shqiptar organizon.
Dominojnë Stela, Eagles, Tirana dhe Teuta si pretendente kryesore për trofe. Dallohen Nikol Merizaj, Telma Harshova, Sonia Kapedani, Sara Dande, Klavio Meça dhe Ergi Veli
Tetë ekipe në garë, titulli kampion për të rritur i rëndësishëm
Tetë ekipe janë vënë në garë për titullin kampion të të rriturve dhe të rinjve. Pikërisht Stela, Tirana, Partizani, Teuta, Eagles, Uillson,Tradita, Vala janë vënë në garë me njëra-tjetrën për trofeun më të rëndësishëm të vitit, që është titulli kampion për të rritur e të rritura. Por jo vetëm kaq, por dhe për të rinj dhe të reja. E në përgjithësi, ndërsa noti shqiptar është dhe përpara garave të rëndësishme, duke nisur që nga Kampionati Botëror i të rriturve në Korenë e Jugut, apo i të rinjve në Budapest, pa harruar pjesëmarrjen në Festivalin Evropian Rinor në Baku, ky kampionat ka qenë edhe një farë testimi. Në përgjithësi garat e ditës së parë janë dominuar nga Stela e Sadik Memës, Eagles e Eduard Canes, Tiranës së Arjan Fetishajt dhe Teutës së Gjergj Ngresit. Por më e fortë duket se do të jetë gara për sportistin më të mirë të këtij edicioni. Sepse që tani ka sportistë të cilët kanë mbi dy-tre vende të para jo vetëm për të rritur e të rritura, por dhe për të rinj dhe të reja. Të tillë si Nikol Merizaj, Telma Harshova, Sonia Kapedani, Sara Dande, Klavio Meça dhe Ergi Veli. Ndaj dita e dytë e kampionatit, që do të përfundojë në mbrëmjen e vonë të së martës, do të jetë vendimtare për gjithçka në këtë kampionat të rriturish, i cili është aktiviteti i parafundit kombëtar i notit shqiptar. Për ta mbyllur do të jetë më pas Kupa e Shqipërisë për të rritur.
Rekordi
Vetëm një rekord është regjistruar në ditën e parë të kampionatit kombëtar për të rritur dhe të rinj. Ai i ka takuar Tiranës për femra, në stafetën 4×100 metra miks, ndërsa skuadra bardheblu ka vendosur kohën e re prej 5’19”50. Në morinë e garave të ditës së dytë, të cilat janë 20, 10 për të rritura e të reja dhe 10 për të rritur dhe të rinj, pritet të ketë rezultate të përmirësuara, pse jo dhe për moshat më të vogla. Gjithsesi, përtej temperaturave të nxehta në kryeqytet, kampionati i notit për të rritur dhe të rritura ka sjellë një tjetër atmosferë në kryeqytet.
Rezultatet teknike të Kampionatit Kombëtar i të Rriturve & të Rinjve
TË REJA
50 M STIL I LIRË SARA LIMAJ (STELA) 31”04
100 M STIL I LIRË NARGI GOLASHI (TEUTA) 1’06”91
800 M STIL I LIRË SARA DANDE (STELA) 10’17”32
50 M BRETKOSË TELMA HARSHOVA (STELA) 38”13
200 M SHPINË SONIA KAPEDANI (EAGLES) 2’35”16
200 M DELFIN EMI METALLA (STELA) 3’14”06
200 M KATËRNOTIM TELMA HARSHOVA (STELA) 2’46”72
400 M KATËRNOTIM SONIA KAPEDANI (EAGLES) 5’35”75
TË RINJ
100 M STIL I LIRË DALVI ELEZI (TEUTA) 2’03”62
200 M STIL I LIRË PAOLO PRISKA (EAGLES) 4’27”37
50 M BRETKOSË XHON DIKO (EAGLES) 32”10
50 M SHPINË ELIO VELI (STELA) 30”87
100 M SHPINË ELIO VELI (STELA) 1’05”38
50 M DELFIN ERGI VELI (STELA) 27”28
100 M DELFIN ENDI KOLA (STELA) 1’04”12
200 M KATËRNOTIM ERGI VELI (STELA) 2’21”79
400 M KATËRNOTIM ERGI VELI (STELA) 4’52”66
TË RRITURA
50 M STIL I LIRË NIKOL MERIZAJ (TIRANA) 27”66
100 M STIL I LIRË NIKOL MERIZAJ (TIRANA) 1’01”57
800 M STIL I LIRË SARA DANDE (STELA) 10’17”32
50 M BRETKOSË TELMA HARSHOVA (STELA) 38”13
200 M SHPINË SONIA KAPEDANI (EAGLES) 2’35”16
200 M DELFIN EMI METALLA (STELA) 3’14”06
200 M KATËRNOTIM TELMA HARSHOVA (STELA) 2’46”72
400 M KATËRNOTIM SONIA KAPEDANI (EAGLES) 5’35”75
4X100 MIKS TIRANA 5’19”50
TË RRITUR
100 M STIL I LIRË KLAVIO MEÇA (TEUTA) 2’00”37
200 M STIL I LIRË KLAVIO MEÇA (TEUTA) 4’16”87
50 M BRETKOSË KRISTI PETKO (EAGLES) 31”97
50 M SHPINË ALEKSANDËR NGRESI (TEUTA) 30”84
100 M SHPINË ELIO VELI (STELA) 1’05”38
50 M DELFIN ERGI VELI (STELA) 27”28
100 M DELFIN KEIS FETISHAJ (TIRANA) 1’03”66
200 M KATËRNOTIM ERGI VELI (STELA) 2’21”79
400 M KATËRNOTIM ERGI VELI (STELA) 4’52”66