Napoli sfidë Ronaldos, blindon Hysaj

306

Afrim lojtarësh për të përforcuar skuadrën, shitje por edhe rinovime. Napoli mbetet aktiv në merkato por një çështje me rëndësi te nënkampionët e Italisë është cilësuar edhe e ardhmja e mbrojtësit Elseid Hysaj.

Ai e ka të qartë se çfarë kërkon të arrijë sezonin e ardhshëm, ku flet për Championsin. ”Rinovimi i kontratës sigurisht që do të më pëlqente por kam edhe tre vite, të presim se çfarë do të ndodhë. Duam të fitojmë diçka dhe kur e them këtë, nuk e kam fjalën vetëm për “Scudetton”. Duam gjithçka. Edhe Championsi nuk është keq (qesh). Me kalimin e kohës çdo trofe ka rëndësinë e tij. Të avancosh në Europë është bukur, shpresojmë të arrijmë sa më larg. Ancelotti ka fituar tre Champions. Ka shumë eksperiencë dhe do të na mësojë shumë”,-thotë Hysaj.

I kërkuar me ngulm nga Chelsea, shqiptari ishte edhe në radarët e Manchester United dhe Liverpool. Gjithsesi, Hysaj mbetet një prej elementëve më të rëndësishëm të Napolit, me drejtuesit e klubit që janë takuar me menaxherin e lojtarit, Mario Giufreddi.

Ky i fundit pohoi se bisedoi me klubin rreth planeve për Hysajn dhe të ardhmes, duke bërë të ditur se gjithsesi palët nuk e kanë me nxitim që të rinovojnë kontratën aktuale që përfundon në vitin 2021. Giufreddi saktësoi se nëse Napoli do ti propozojë zgjatjen e marrëveshjes, patjetër që palët do të uleshin të bisedonin, sepse Hysaj kërkon të tregojë që është i fortë edhe në fazën ofensive dhe se mund të paraqitet mirë edhe pa trajnerin Sarri.

Negociatat për rinovimin e kontratës së Hysajt janë shtyrë për në muajin shtator, kur përfaqësuesi i lojtarit kuqezi dhe drejtuesit e Napolit do të zhvillojnë një tjetër takim. Plani i klubit të Serisë A është që ta “blindojë” mbrojtësin shkodran, me një kontratë afatgjatë deri në vitin 2023. Në anën tjetër, menaxheri i kuqeziut pretendon nga klubi heqjen e klauzolës me vlerë 50 milionë euro për prishjen e kontratës, si edhe rritjen e pagës.

Aktualisht Elseid Hysaj përfiton diçka më tepër se 2 milionë euro në sezon, ndërsa në kontratën e re, në rast se palët gjejnë gjuhën e përbashkët, rroga e mbrojtësit pritet të shkojë në shifrën 2,5 milionë euro.

Por Hysaj ka edhe një mesazh për Ronaldon, për të cilin thotë se nuk do t’i shënojë Napolit por e pranon se ai është lojtar i një niveli të lartë.

”Siç e dimë të gjithë, është një lojtar i nivelit shumë të lartë. Më bëhet qejfi që ka ardhur në Itali, na stimulon shumë prania e tij. Markimi i tij është një sfidë që më pëlqen. Ne jemi një grup i madh dhe një lojtar i vetëm nuk bën grup. Të shohim si do të përshtatet në Itali. Një lojtar i vetëm mund të bëjë diferencën në një ndeshje të caktuar, jo përgjatë gjithë kampionatit”,-thotë Hysaj.