Lojërat Olimpike Dimërore, që do të mbahen në Pyenongchang të Koresë së Jugut, janë vetëm 100 ditë larg.
Në vendin aziatik, tashmë ka nisur numërimi së prapthi deri në fillimin e këtij kompeticioni të rëndësishëm. Këtë të enjte, në Athinë u organizua ceremonia e nisjes së rrugëtimit të flakës olimpike drejt kontinentit aziatik.
Pishtari olimpik do të përshkojë 2.018 km deri në Pyeongchang, më 9 shkurt, kur do të zhvillohet ceremonia e hapjes së këtyre lojërave.
Olimpiket Dimërore të vitit të ardhshëm në Pyeongchang do të mbahen në një resort malor, një zonë kjo që është 80 km larg kufirit me Korenë e Veriut. Testet e njëpasnjëshme bërthamore të kryera nga Peniani kohët e fundit ngritën shumë dyshime, e ngjallën disi panik në ambiente të ndryshme sportive.
Më parë, Koreja e Jugut ka organizuar Lojërat Olimpike të vitit 1988 dhe Kupën e Botës 2002, së bashku me Japoninë, dhe të dyja këto kompeticione u përjetuan me frikën e agresionit nga ana e Koresë së Veriut.
