Dje pas dite, UEFA ka dalë me një deklaratë zyrtare, duke njoftuar se dy inspektorët që kanë kryer hetimin për Skënderbeun, belgu Karl Dhont dhe spanjolli Migel Lietard Fernandez-Palasio, janë kërcënuar me jetë nga persona anonimë. UEFA njofton se për këtë rast është njoftuar edhe presidenti Aleksandar Ceferin, i cili ka deklaruar se: “Ne nuk do të tërhiqemi kurrë nga këto çështje, edhe pse palë të treta përpiqen të na trembin. Ata (inspektorët) që po merren me këtë çështje kanë mbështetjen totale të UEFA-s dhe timin personal”. Në deklaratën e plotë të Presidentit të UEFA-s, thuhet mes të tjerave se, këto kërcënime nuk do të kenë sukses dhe policia është njoftuar gjithashtu. UEFA i gjithë stafi i saj që punon në këto çështje vendimtare, mund të llogarisë në mbështetjen e plotë të organizatës.
