Mënyra si rrodhën ngjarjet në “Camp Nou” ka shtyrë shumë media të zbardhin planin që kishte në mendje Unai Emeri. Trajneri spanjoll i PSG-së konsiderohet si përgjegjësi kryesor i dramës që përfshiu parisienët, të cilët, me kalimin e minutave humbën sigurinë dhe u kthyen në një ekip të ndrydhur e në panik.
Plani fillestar
Sipas “L’Équipe”, ata që akuzojnë Emerin për mendjemadhësi nuk dinë për çfarë flasin, pasi iberiku i trembej rikthimit të madh të Barcelonës. Duke qenë se njeh mjaft mirë rivalin (si spanjoll e dinte se çfarë ishte në gjendje të bënte Barça) rekomandoi lojtarët që të luanin në bllok vetëm 30-35 metra larg portës së Kevin Trap.
E përditshmja franceze zbuloi se Emeri shkoi në Barcelonë për të “mbrojtur” rezultatin e takimit të parë (4-0) dhe jo për të “vrarë” Barçën. Ai kishte rekomanduar Kavanin që të luante si mesfushor pranë Verratit dhe Matuidis, ndërkohë që, sa herë uruguaiani shkonte në sulm, i thoshte: “Zbrit poshtë”. Të njëjtat detyra mbrojtëse “lidhën” edhe Drakslerin e Mourën, të cilëve u rekomandonte që të ktheheshin në mbrojtje për të ndihmuar Munien dhe Kurzauën.
Plani B
Ngjarjet rrodhën në atë mënyrë që plani i parë i Emerisë shumë shpejt doli jashtë funksionit. PSG-ja pësoi shumë shpejt golin e parë, ndërsa para se të shkonte në dhomat e zhveshjes u ndëshkua sërish duke “rihapur” çështjen e kualifikimit.
“Duhet të tregoni se rezultati i takimit të parë nuk ishte rastësi! Ne pas ndeshjes të sotme mund të kthehemi në ekipin më të fortë të Europës”, ishte mesazhi që u dha lojtarëve Emeri përpara se të futeshin në lojë. Në pushimin mes pjesëve ai ndihmoi lojtarët që të mos i kapte paniku, duke u thënë: “Më dëgjoni! Edhe pse në pjesën më të madhe të karrierës si futbollist kam qenë pjesë e një skuadre të kategorisë së dytë, kam më shumë eksperiencë se ju, prandaj më dëgjoni…”
