Nga Agron KAJA
U luajtën dje 90 minutat e fundit në Kategorinë Superiore, ja si i përshkruan për “Telegraf” ish-futbollisti i Dinamos dhe i Kombëtares
Dje u mbyllën 36 javët e Kategorisë Superiore 2017-2018, në ritmikën e tyre, duket sikur gjithçka nisi e mbaroi shumë shpejt?
Kemi ndjekur një kampionat që u fillua me vonesë më 19 shtator 2017, dhe përfundoi dje me vonesë më 23 maj 2018. E duke menduar që do të luhet finalja e Kupës së Shqipërisë, bëhemi vendi i vetëm në Evropë me këtë kohështrirje të sezonit 2017-2018.
Si i përshkruani rezultatet që u shënuan në këtë javë të fundit të Kampionatit?
Për mendimin tim, u luajt një teatër i pastër në sytë e FSHF-së, e cila dje ka qenë me syze saldatori, ku para hundës së saj në Korçë, Vllaznia shënoi 5 gola, ndërsa Skënderbeu pësoi humbjen e pestë radhazi. Nuk e kuptoj se çfarë mesazhi japin kështu!
E prisnit që Vllaznia të zbriste në Kategorinë e Parë?
Patjetër që e prisja, dhe nuk e quaj ndonjë hata të madhe, sepse kanë zbritur Tirana, Partizani, Dinamo dhe Elbasani, skuadra edhe këto që kanë fituar Tituj Kampionë dhe Kupa. Kjo Vllazni nuk vuri mend nga sezoni i kaluar, dhe i ndodhi njësoj si Hamburgut në Gjermani.
Edhe në zonën e Evropës pati lëvizje, e meritonte Partizani të ishte në këtë vend në renditje?
Partizani ka treguar luhatje në këtë Kampionat, por gjithçka në këtë renditje është bërë me llogaritë e “dirigjentëve” të kësaj komedie. Të gjitha deklaratat e trajnerëve, apo të drejtuesve të klubeve para ndeshjeve, ishin se do të luhej futboll i pastër, ndërsa pas tyre, janë “fshehur” për çka thanë.
Në këndvështrimin tuaj, çfarë veçoni në këtë javë të 36-të?
Kjo javë e 36-të, ndoshta që në fillimin e fazës së katërt, u pa qartë se kjo fazë nuk duhej të luhej. Sepse gjatë saj nuk është luajtur futboll real, por me llogari matematikore, e cila e ka prishur bukurinë e garës dhe e ka ulur dinjitetin e të gjithëve që kanë hyrë në këtë “valle”.
Një kampionat që i mban në tension skuadrat deri në fundin e tyre, çfarë tregon sipas jush?
Tregon se është një “teatër Kampionat”. Ja u deklarova më sipër, se tensioni në fazën e katërt ka qenë nëpërmjet llogarive jashtë fushe, jo nëpërmjet lojës së ndershme në fushën e lojës. Unë nuk dua të jem pjesë e e kësaj shfaqjeje, jam kundër këtij futbolli.
Po skuadra Kampione, Skënderbeu, çfarë portreti meriton prej jush në këtë titull të 8-të të saj?
Kemi një Skënderbeu që gjatë këtij sezoni luajti me dinjitet në Evropë, dhe nga ana tjetër, kemi një Skënderbe që në fazën e katërt të Kategorisë Superiore, në pesë javët e fundit ishte shëmtia e tij. Pesë humbjet resht janë më shumë se çudi për cilindo që e njeh futbollin shqiptar.
Çfarë duhet të ndryshojnë skuadrat për sezonin tjetër, në raport me mangësitë që shfaqën në këtë sezon që u mbyll?
Vetëm fazat e Kampionatin të zvogëlohen në numër, nga 4 në 3. Nuk mund të thuash më shumë për një fazë të katërt që e bëri shumë pis këtë futboll. Unë nuk bëj pjesë në këtë estradë.
Nuk e quaj ndonjë hata të madhe rënien e Vllaznisë në Kategorinë e Parë, sepse kanë zbritur Tirana, Partizani, Dinamo dhe Elbasani, skuadra edhe këto që kanë fituar Tituj Kampionë dhe Kupa. Kjo Vllazni nuk vuri mend nga sezoni i kaluar
3 herë
Vllaznia është skuadra e dytë që zbriti nga Kategoria Superiore, dhe kjo është hera e tretë, pasi kishte provuar në 1956-ën dhe 1961-in
20 gola
Në javën e fundit të Kampionatit të Kategorisë Superiore 2017-2018, u shënuan 20 gola, 2 me penallti dhe 2 autogola
Rezultatet-Java e 36-të
Dje, 23 maj 2018
Laçi-Teuta 4-2
Shënues: Rexhinaldo 7’, Jonuzi 61’, Ozuni 78’, 83’/ Peqini 55’, Hila 85’
Lushnja-Luftëtari 1-2
Shënues: Sefa (p) 90+2’/Alushi 34’ (a), Shkurtaj 38’
Skënderbeu-Vllaznia 1-5
Shënues: Gripshi 50’/ Sukaj 19’ (p), Kalaja 28’, Çinari 61’, 78’, Malota 70’
Kukësi-Flamurtari 2-2
Shënues: Hoxha 49’, Guri 74’/ Bushiç 38’, Shameti (a) 53’
Partizani-Kamza 0-1
Shënues: / Rezi 48’
RENDITJA
Skuadrat Nd P
- Skënderbeu 36 72
- Kukësi 36 63
- Luftëtari 36 59
- Laçi 36 56
- Partizani 36 53
- Flamurtari 36 46
- Kamza 36 46
- Teuta 36 46
- Vllaznia 36 44
- Lushnja 36 11