Shkodranët fitojnë 2-0 me kryeveprat e Krujës e Shtubinës dhe çojnë Tiranën në “zonën e kuqe”
Vllaznia mori tri pikë të arta në fushën e vështirë të Laçit, falë dy eurogolave të realizuar nga Kruja e Shtubina, ndërkohë që suksesi i tretë në transfertë përkoi edhe me ndeshjen e parë të trajnerit malazez Dervish Haxhiosmanoviç. Kuqeblutë përfitojnë nga ndalesa e Tiranës në derbi me Partizanin, për t’i spostuar bardheblutë në vendin e 9-të, pikërisht në zonën e ftohtë të renditjes, duke e bërë edhe më të bukur garën në këtë fazë të tretë të kampionatit. “Kemi marrë një fitore mjaft me vlera sot e sigurisht kjo më kënaq mua e skuadrën. Kjo fitore ka vlera të mëdha sidomos për anën psikologjike të lojtarëve. U futëm në fushën e lojës për ta fituar këtë takim e ia dolëm të arrinim qëllimin tonë. Skuadra u vendos mjaft mirë në fushë duke bërë një ndeshje taktikisht perfekte. Duhet të vazhdojmë në këtë rrugë pasi mbijetesa do punë për tu arritur e skuadra duhet të vijojë të tregojë të njëjtën dëshirë e grintë si sot”, – tha pas ndeshjes trajneri i Vllaznisë, Dervish Haxhiosmanoviç, i cili është dhe fituesi i titullit të fundit të shkodranëve në sezonin 2000-2001. Shkodranët e dominuan takimin si të luanin në “Loro Boriçi”. Kuqeblutë e gjetën golin qysh në minutën e 8-të me një goditje spektakolare të Arsid Krujës nga jashtë zonës, duke e bërë të pavlefshëm reagimin e Edvan Bakajt. Laçi kundërpërgjigjet tre minuta më pas me Emiljani Çelën, që i paraprin ndërhyrjes së Vujadinovic, por topi përfundon jashtë. Kontakti ashpër mes mbrojtësit vendas dhe portierit malazez bën që loja të ndalet për pesë minuta, derisa Vujadanoviçi u ngrit në këmbë për të qëndruar në fushë deri në fund madje duke kryer disa ndërhyrje vendimtare në momentet e goditjeve standarde të Laçit. Një kombinim mes Beqirit dhe Bushiçit, për pak përfundon në rrjetë. Në minutën e 19-të, ndërsa Ndriçim Shtubina pas një inkursioni personal, mposht për herë të dytë Bakajn me një përkëdhelje të topit. Laçin bën gjithçka në fraksionin e parë për të ndryshuar shifrat, por kurbinasit edhe pse sulmojnë me shumë forca janë të paqartë në fazën përmbyllëse të aksioneve. Edhe në pjesën e dytë nismën e morën vendasit, por kuqeblutë ishin më të rrezikshëm nëpërmjet kundërsulmit, ku në tre raste Bushiç dhe Hajdari nuk mundën të thellonin diferencën. Vlen të veçohet rasti i minutës 74-t, kur tentativa me kokë e sulmuesit malazez u ndal në vijën fatale nga Sefgjini. Kjo ishte fitorja e 7-të në 25 ndeshje për Vllazninë, që javën e ardhshme do të presë Skënderbeun në “Loro Boriçi”. Korçarët kryesojnë kampionatin me 14 pikë më shumë se tre ndjekësit më të afërt, Partizani, Laçi e Kukësi, që kanë pikë të barabarta nga 40.
KATEGORIA SUPERIORE
JAVA XXV
Dje, 23 mars
LAÇI-VLLAZNIA 0-2
Shënues: Kruja 5’, Shtubina 26’
KASTRIOTI-LUSHNJA 2-1
Shënues: Ferraj 4’, Bratiç 18’ / Canka 55’ (pen)
Të shtunën, 22 mars
PARTIZANI-TIRAAN 1-1
Shënues: Nexhipi 94’ / Morina 43’
KUKËSI-FLAMURTARI 4-2
Shënues: Cikalleshi 12’, 59’, Boja 61’, Smajli 86’/ Liçaj 25’, G.Lika 90’
Të premten, 21 mars
TEUTA-BESA 1-0
Shënues: Idrizaj 63’
SKËNDERBEU-BYLIS 3-0*
Fitore në tavolinë
RENDITJA
1 Skënderbeu 25 +23 54
2 Partizani 25 +7 40
3 Laçi 25 +6 40
4 Kukësi 25 +2 40
5 Teuta 25 +4 36
6 Besa 25 +2 34
7 Flamurtari 25 -2 31
8 Vllaznia 25 +0 29
9 Tirana 25 -7 28
10 Kastrioti 25 -9 26
11 Bylis 25 -10 24
12 Lushnja 25 -16 23
* Bylisi është përjashtuar nga kampionati
Kastrioti mposht Lushnjën
Kastrioti fitoi 2-1 me Lushnjën në një betejë të vërtetë mbijetesë. Ferraj (4’) dhe Bratiç (18’) ishin dhe autorët e golave të krutanëve të drejtuar nga Nevil Dede. Lushnja shënoi golin e vetëm me anë të Mikel Cankës, që nuk gaboi nga pika e bardhë në minutën e 55-të. Vendi i fundit mbetet “pronë” e lagunarëve të Banos, që tashmë e kanë marrë rrugën për një kategori më poshtë. Tri pikët ringjallin shpresat e Kastriotit për mbijetesë, teksa mban vendin e dhjetë për momentin, me 26 pikë.
Të mërkurën, gjysmëfinalet e Kupës
Kukësi-Teuta dhe Flamurtari-Skënderbeu janë çiftet gjysmëfinaliste të edicionit të 62-të të Kupës së Shqipërisë. Ndeshjet do të luhen të mërkurën, ndërkohë që ato të kthimit do të zhvillohen më 9 prill. Nga katër skuadrat gjysmëfinaliste, vetëm Flamurtari dhe Teuta e kanë fituar nga tri herë Kupën e Shqipërisë, ndërkohë që nëse do ta fitonin, Skënderbeu dhe Kukësi do ta kishin për herë të parë. Më shumë trofe në Kupë kanë Partizani dhe Tirana, të dyja nga 15, por të dy ekipet kryeqytetase nuk ia dolën të shkonin as në çerekfinale.
KUPA E SHQIPËRISË
GJYSMËFINALET
NDESHJET E PARA
26.03.2014
Kukësi-Teuta
Flamurtari-Skënderbeu
NDESHJET E KTHIMIT
09.04.2014
Teuta-Kukësi
Skënderbeu-Flamurtari
Presidenti i FSHF-së viziton Kombëtaren U-17, para nisjes në Çeki për ndeshjet e “Elite Round”
Duka: “Na nderoni në Europian!”
Dje paradite, Presidenti i FSHF-së, Armand Duka, vizitoi ekipin Kombëtar U-17 në ambientet e Resortit “Tropikal” në Durrës. Ai u interesua nga afër për përgatitjet që ekipi po bën në prag të ndeshjeve të fazës “Elite Round” të Kampionatit Europian, që do të luhen këtë javë me Republikën Çeke, e ku marrin pjesë edhe Anglia me Italinë. “Ju keni vëmendjen tone maksimale, sepse jeni e ardhmja e futbollit shqiptar dhe FSHF-ja po punon e investon, që ajo të ketë, sa më shumë sukses. Nuk është e rastësishme që, për dy edicione radhazi, ju jeni kualifikuar për në turin e dytë në Kampionatin Europian. Uroj të vazhdoni në këtë rrugë” – citohet Duka nga faqja zyrtare e FSHF-së. Trajneri boshnjak Xhemal Mustedanagiç e njohu Dukën me gjendjen e skuadrës dhe objektivat për këto ndeshje. Sot, skuadra do të udhëtojë drejt Republikës Çeke. Trajneri Mustedangiç ka grumbulluar 18 lojtarë, ku vetëm katër prej tyre luajnë në kampionatin shqiptar të moshave, ndërkohë që pjesa tjetër (14 lojtarë) luajnë në Greqi, Zvicër, Itali, Belgjikë, Austri e Kosovë.
KALENDARI I NDESHJEVE
“ELITE ROUND”, GRUPI 4
26 mars
Itali- Shqipëri
Ora: 14.00, Stadiumi: Letna
Angli-Republika Çeke
Ora: 17.00, Stadiumi: Stonky
28 Mars
Angli-Shqipëri
Ora: 14.00, Stadiumi: Stonky
Republika Çeke-Itali
Ora: 17.00, Stadiumi: Letna
31 Mars
Itali-Angli
Ora: 17.00, Stadiumi: Letna
Shqipëri-Republika Çeke
Ora: 17.00, Stadiumi: Stonky
LOJTARËT
Portierë
Elhan Kastrati Teuta
Jorgo Muça PAOK
Mbrojtës
Adrit Toli Olimpiakos
David Domgjoni Shkëndija
Paulo Ivani Shkëndija
Arbi Raxha Olimpiakos
Ardit Muholli Rapidi i Vjenës
Mesfushorë
Federiko Zenuni Torino
Ardit Deliu Besa
Keidi Bare Atletiko Madrid
Franc Bakalli Steaua Bukuresht
Kevin Myftiu Vicenca
Armand Gjokaj Gent
Heroid Gjoshi Grasshoper
Sulmues
Alesio Hyseni Peruxhia
Axhelo Zoizi Breshia
Ardit Granica Prishtina
Dinamo barazon me Mamurrasin
Dinamo barazoi 0-0 me Mamurrasin, në ndeshjen përmbyllëse të javës së 22-të të Kategorisë së Parë. Blutë u ngjitën në kuotën e 36 pikëve, tetë më pak se Apolonia e vendit të dytë. Kampionati kryesohet nga Elbasani me 46 pikë. Nga Kategoria e Parë në Superligë ngjiten vetëm dy vendet e para, që mbahen përkatësisht nga Elbasani dhe Apolonia.