Nuk është nga ata që preferojnë të flasin për arbitrimin, por pas ndeshjes së dytë me episode kundër, Duro flet hapur se në dy ndeshjet që skuadra e tij nuk ka fituar është dëmtuar nga situata të dukshme, që kanë ndikuar në rezultatin e ndeshjes, pavarësisht se nuk ngurron ta quajë ndeshjen me Bylis, si më të dobtën që Kukësi ka zhvilluar nën drejtimin e tij.
“Mund të them se ka ndikuar plotësisht – tha Duro – . Më vjen keq sepse kundër Lacit ishte një 11 meëtërsh i pastër, i parë nga të gjithë përvec arbitrit, por edhe kundër Bylis ishin dy penallti të padhëna për ne në pjesën e dytë, ndërkohë që penalltia ishte një simulim i pastër i Goxhajt”.
Në dy ndeshjet e kontestuar Kukësi ka marrë vetëm një pikë, atë në Lac në barazimin 1-1, ndërsa tani vjen përplasja me kryesuesit e kampionatit, Tiranën. Ndoshta nuk është momenti ideal për Kukësin, por është një ndeshje për të mos u humbur. “Fitorja nuk është një detyrim, jo më Tiranën, por edhe me një skuadër dytësore nuk do ta konsideroja si detyrim. Skuadra duhet të japë maksikmimin dhe kjo është detyra e saj, pastaj bilanci bëhet në përfundim të kampionatit, nëse kemi marrë pikët që duhet”.
Disfata në Ballsh nuk ka tronditur vetëm ambjentin kuksian, por ka evidentuar edhe një problem serioz: pa Ethemin dhe Mustën Blutë kanë humbur shumë në intensitet. Tekniku duhet të bëjë përsëri pa dyshen, por ka bindjen se Abazaj dhe Gavazaj do të bëjnë diferencën.