De Biazi fikson titullarët ndaj Izraelit

54

Taktika e përdorur nga trajneri i Kombëtares, Xhani De Biazi, gjatë përgatitjeve në kuadër të ndeshjes me Izraelin, lë të kuptohet se do të shohim si rrallëherë një skuadër me karakter sulmues. Kjo, jo vetëm për faktin se pritet të zbresin në fushë lojtarë me karakteristika ofensive, por edhe nga skemat që italiani ka përgatitur për të goditur kundërshtarin.

Ndryshe nga sfida me Spanjën, kundër Izraelit skuadra pritet të vendoset më lart në fushë për të qenë më afër zonës kundërshtare në kërkim të golit. Duke marrë parasysh faktin se luhet përballë një kundërshtari direkt për vendin e tretë dhe çdo rezultat ka vlerë të dyfishtë, italiani po përdor të gjitha modulet e mundshme në seancat stërvitore, me qëllim të përballojë me sukses çdo situatë, në të cilën do të përfshihet skuadra gjatë 90-minutëshit.

Udhëzimet
Kombëtarja zhvilloi dje vetëm një seancë stërvitore. Skuadra u ushtrua gjatë paradites në Durrës, teksa trajneri mendoi të mos i lodhte shumë lojtarët, me qëllim për t’i ruajtur dhe shkarkuar të gjitha energjitë në sfidën e së shtunës. Në seancën e djeshme u aplikuan disa skema, si në variantet mbrojtëse, ashtu edhe ato sulmuese.

Për shkak të rëndësisë së madhe që paraqet kjo përballje, stafi teknik i Kombëtares shqiptare po studion me detaje të gjitha alternativat që do ta çonin drejt suksesit. Krahas skemave mbrojtëse dhe sulmuese, italiani vuri në zbatim me skuadrën disa variante, të cilat konsistonin në kontrollin dhe qarkullimin në mënyrë perfekte të topit.

Goditjet standarde ishin një tjetër mënyrë, nga e cila italiani vuri shumë theksin. Fatmirësisht, seanca e fundit në Durrës u mbyll pa asnjë problem dhe përveç Roshit që u stërvit i diferencuar, në të mori pjesë rregullisht edhe Sadiku, sulmuesi i rikthyer nga dëmtimi.