Nga Agron KAJA
Në prag të finaleve të Botërorit “Rusi 2018”, ja si vjen atmosfera e tij nga gazetari, shkrimtari e “Mjeshtër i Madh”, nga Roma ai sjell edhe emocionet shqiptare për këtë event të futbollit botëror
Jeni bërë edhe ju pjesë në atmosferën e Botërorit të futbollit “Rusi 2018”?
Dhe të mos duash, si pa kuptuar kushdo e sheh veten të përfshirë në këtë festë të bukur sportive. E kam fjalën jo vetëm për ne gazetarët sportivë, por edhe për ata njerëz të thjeshtë që largojnë disi mendjen nga vështirësitë e problemet e ditës, le pastaj profesorë e akademikë, etj.
Kur mbani mend që të keni ndjekur Botërorin e parë në jetën tuaj?
Personalisht, pjesë e atmosferës së botërorëve jam ndjerë që nga Kampionati i vitit 1954, kur sapo kisha filluar të kuptoja paksa italisht, dëgjoja në radio emrat e futbollistëve të famshëm hungarezë: Pushkash, Bozhik, Hidegud, Grosiç etj., dhe të gjermanëve Shefer, Veber, Han etj., në atë finale dramatike 3-2 për gjermanët.
Si e shikoni atmosferën mediatike e qytetare në Shqipëri në prag të Botërorit?
Më lart ju fola diçka lidhur me këtë pyetje. Gjithsesi, shtypi i përditshëm dhe mediat audiovizive prej kohësh e kanë në qendër të vëmendjes Botërorin “Rusi 2018”, madje di që, si dhe herë të tjera, nuk do të mungojnë emisionet e drejtpërdrejtë.
Do të ndjehet në këtë Botëror mungesa e Italisë dhe Holandës?
Sigurisht që po, dhe madje shumë. “Mondiale senza l’azzurro” shkruante dje një revistë prestigjioze italiane “…e un pecato o forse un errore?!” (është një mëkat apo një gabim?). Gjithsesi, këto janë gjëra që kanë ndodhur dhe do ndodhin nëpër botërorë.
Ju për cilën skuadër do të bëni tifo në këtë Botëror?
Me qenë se mungon Italia, nuk diskutohet për Anglinë, por do mbështes edhe Zvicrën e Suedinë, në radhët e të cilëve luajnë futbollistë shqiptarë. Madje edhe Belgjikën, nëse aktivizon Jonuzajn.
Si e mendoni rivalitetin që në ndeshjet në grupe?
Padyshim që nuk do të mungojë. Do të jetë interesant e tërheqës, sidomos në grupin E ku luajnë Brazili, Zvicra, Kosta Rika dhe Serbia. Në grupet e tjerë them se do të dominojnë skuadrat e traditës.
Po për fitimin e Kupës, mendoni se rivale do të jenë skuadrat e traditës?
Këtu kam parasysh Gjermaninë, Brazilin, Spanjën, Francën, Argjentinën, Anglinë e Portugalinë, skuadra këto nga të cilat do të dalë kampionia e re e Botës. Vështirë të ketë surpriza, gjithsesi nuk i përjashtoj.
Si keni menduar t’i ndiqni këto finale të Botërorit?
Për shkak të një angazhimi familjar, aktualisht gjendem në Romë, nga ku për herë të parë do t’i ndjek finalet jashtë Shqipërisë. Do më mungojë atmosfera e Tiranës, por do jem mes miqsh italianë, me të cilët përjetova në nëntor eliminimin e “azzurri” nga Suedia, që nuk arriti të organizojë një sulm në portën e Italisë.
Çfarë këshilloni për mediat në këtë prag të Botërorit?
Të mos kenë në panele politikanë dhe analisto-opinionistët e përçdonatshëm. T’i lenë më në fund të qetë teleshikuesit në përzgjedhjen e në rehatin e tyre. Stop pranisë së miseve, që veçmas broçkullave qesharake, më së shumti gjenden aty për të ekspozuar gjokset, këmbët e fustanet.
Duhet të ketë më shumë informacion mediatik para dhe gjatë Botërorit?
Padyshim, madje me hapat gjigantë të këtij digjitalizimi, informacioni duhet të jetë më i bollshëm dhe më i hollësishëm. Në harkun e 31 ditëve, në 64 takimet që do të luhen, do përjetojmë një atmosferë të paparë futbollistike, së cilës i uroj të ketë ritmin e “Kazaçokut”, valles së famshme ruse.
Për herë të parë në TV kam ndjekur Botërorin “Angli 1966”, e në vijimësi deri sot. Dhe këto ditë, ndonëse i dëshpëruar nga dy disfatat e rënda të kombëtares sonë, gjithsesi gjendem tërësisht në atmosferën ruse të kampionatit që po troket
Imagjinoni se cilat ekipe mbeteshin jashtë botërorit kur numri i finalistëve ishte me 16 ekipe! Është vërtet për të ardhur keq që nuk do të jetë katër herë kampionia e Botës Italia e Rosit, Maldinit, Barezit, Zofit, Del Pieros, Pirlos, Bufonit, Tottit etj., do mungojë tri herë finalistja në botërorë, Holanda e Krujfit, Krolit, Hulshofit, Neskens, Han, Van Basten, Gulit, Roben etj
Skuadrat e Grupit B
PORTUGALIA
Themelimi: 31 mars 1914
Pjesëmarrje: 6 herë
Suksesi në gj/finale: 2 herë
(1966 dhe 2014)
President: Fernando Gomez
Trajner: Fernando Santos
Ylli në ekip: Kristiano Ronaldo
Slogani: E kaluara, lavdi; e tashmja, histori
SPANJA
Themelimi: 14 nëntor 1909
Pjesëmarrje: 14 herë
Suksesi në gj/finale: 2 herë
(1934 dhe 2014)
Në finale: 1 herë (2010)
Kampione: 1 herë (2010)
President: Ruis Rubiales
Trajner: Zhulien Lopetegiu
Kapiten: Serxhio Ramos
Slogani: Së bashku jemi të pamposhtur
MAROKU
Themelimi: Viti 1955
Pjesëmarrje: 4 herë
(1970, 1986, 1998, 2018)
Suksesi në Botërorë:
President: Fouzi Lekjaa
Trajner: Herve Renard
Ylli në ekip: Med’hi Benatia
Slogani: Luanët e Atlasit, krenaria e Marokut
IRANI
Themelimi: Viti 1920
Pjesëmarrje: 4 herë
(978, 1998, 2006, 2014)
Suksesi në Botërorë:
President: Mehdi Taj
Trajner: Karlos Kueiroz
Ylli në ekip: Sardar Azmoun
Slogani: 80 milionë persona, 1 komb
GRUPI B/ NDESHJET
Shën Peterburg/ 15.06.2018
Marok-Iran 18:00
Soçi/ 15.06.2018
Portugali-Spanjë 21:00
Moskë/ 20.06.2018
Portugali-Marok 15:00
Kazan/ 20.06.2018
Iran-Spanjë 21:00
Saransk/ 25.06.2018
Iran-Portugali 21:00
Kaliningrad/ 25.06.2018
Spanjë-Marok 20:00
Miqësore dje
E hënë, 4 qershor 2018
Indi-Kenia 3-0
Armeni-Moldavi 0-0
Serbi-Kili
Itali-Holandë
Miqësore sot
E martë, 5 qershor 2018
Kazakistan-Azerbajxh.16:00
Kinë-Zelanda e Re 16:30
Rumani-Finlandë 19:30
Luksemburg-Gjeorgji 20:00
