MERKATO/ Sekretari i FSHF-së nxjerr zbuluar thashethemet e lëvizjeve të futbollistëve në periudhën dimërore
Ditë më parë, në një gazetë të përditshme sportive, sekretari i FSHF-së Ilir Shulku lëshonte një apel për federimet e reja në lëvizjet gjatë kësaj merkatoje dimërore. Kjo thirrje e tij bëhej edhe më evidente, pasi vetë Shulku pohonte faktin që nga skuadrat e Superiores nuk ka ende zyrtarizime. Pas saj, duke parë zyrtarizimin e afrimeve e largimeve, klubet dalin të zbuluar me deklarimet e janarit në merkaton e tyre, pasi deri tani vetëm një largim zyrtar është bërë, ai i Glendi Micit nga Flamurtari te Kukësi, e njëherësh, vetëm një largim zyrtar, ai i Arsid Krujës nga Vllaznia te Hajer Club në Arabinë Saudite. E kështu, duke i mbledhur të gjitha deklarimet e drejtuesve të skuadrave të Kategorisë Superiore në një tabelë përmbledhëse, dalin 87 emra futbollistësh që lëvizin sa në një skuadër në tjetër, sikur të themi se “laj-thaj” e këta janë. Pse? Sepse prej tyre vetëm 4 janë emra të rinj të thirrur rishtas për provë në skuadrat e tyre gjatë këtij muaji ku vetë fjala “merkato” duket e kuptuar në sensin: “… gënje, gënje se diçka do të mbetet”. Dhe këtë staturë e kanë marrë përsipër klubet e Superiores, të cilët të mbështetur verbërisht edhe nga mediat, sjellin e largojnë emra futbollistësh që i mendojnë t’i kenë në përbërjet e tyre. Të jetë kjo një “luftë e ftohtë” që bëhet nga këta aktorë të merkatos, të cilët nga ana e tyre duket se nuk e përfillin rregullin e FSHF-së për federimet, ku nëse ato nuk kryhen brenda 5 ditëve nga nënshkrimi i kontratave, mund të quhen të pavlefshme më vonë ose pranohen me penalitete. Parë nga ky këndvështrim, del qartë se thashethemet e merkatos janë më shumë driblime mediatike që bëhen ose nga skuadrat për interesa të tyre, ose nga gazetarët të cilët çfarë mund të dëgjojnë nëpër tavolina apo nga gojë të paautorizuara, e hedhin në rreshtat ditore të lajmeve të tyre. Shumë prej këtyre skuadrave kanë shtegtuar jashtë Shqipërisë për të bërë një minifazë përgatitore, madje edhe në kampingje stërvitore luksi që kërkojnë shpenzime financiare të kripura dhe të shtrenjta për skuadrat shqiptare të futbollit. Nga ana tjetër, ky pazar i ç’akorduar i mban të ngritura “frenat e dorës” në ecjen para të çdo skuadre, pasi në këtë hapësirë kohe që flitet për merkato, nuk kemi parë një klub futbolli që të ketë ndërtuar strategjinë e tij teknike dhe financiare për merkaton e sezonit, të paktën askush nuk e ka shpallur mediatikisht. Në Evropë, në këtë periudhë merkatoje shohim drejtues klubesh e skuadrash që publikojnë shifra që përfitohen nga shitjet, por deklarohen edhe shifrat e tjera që do të përdoren për blerjet e reja. Tek ne nuk ndodh kështu, ndaj nuk mund të pretendohet se kjo është një merkato cilësore, si për pjesën e futbollistëve, ashtu edhe në atë të trajnerëve që gjatë këtij dimri duket se po i lenë “rehat” në punën e tyre, ku deri tani vetëm Apolonia e vendit të fundit ka ndërruar bankinën. Në këtë vorbull që është krijuar kështu e hallakatur, kush mendon se kemi një merkato cilësore gjatë këtij dimri, gënjen vetëm vetveten. Ka shumë pikëpyetje për këta futbollistë e trajnerë që xhirojnë në këtë merkato, së pari: kur ata do t’i marrin pagat e tyre të prapambetura e pastaj ata le t’i mendojmë se do të jenë në gjendje për vazhdimësinë e mirë të tyre dhe të skuadrave. Së dyti, kur kemi të bëjmë me “limonë të shtrydhur”, apo me “xhaketa të kthyera”, nuk mund të presim kurs të ri me shoferë të vjetër. E së fundmi, kur duhen edhe 5 ditë që të rinisë Kampionati dhe 10 ditë deri në mbyllje të merkatos e jemi në limit të zyrtarizimit të lëvizjeve, gënjeshtrat që hidhen në tregun e lëvizjes së futbollistëve, ose duhen bërë realitet, ose duhen mohuar zyrtarisht. Në Europë dhe në Botë kështu ndodh, por ndoshta drejtues të skuadrave tona të Superiores po presin që Europa dhe Bota të marrë përvojë nga merkatoja shqiptare e futbollit!
DRIBLIMET NË MERKATO
Lëvizje: 87 emra (2 zyrtarë)
Të rinj: 4 emra (jo zyrtarë)
Largime: 52 emra (1 zyrtar)
Afrime: 35 emra (1 zyrtar)
SKUADRAT NË MERKATO
KUKËSI
Larguar: J. Brahja, I. Periç, I. Bejte, I. Allmuça
Afruar: G. Mici (zyrtarisht), K. Tavera, R. Dushku, K. Stanlei, D. Stazhilla, N. Halili, K. Lushtaku
PARTIZANI
Larguar: A. Mustafa, I. Dishiev, R. Dushku
Afruar: D. Bylykbashi, G. Krasniqi
SKËNDERBEU
Larguar: A. Dimo, A. Ribaj, M. Soza
Afruar: A. Stojkov, L. Latifi
TIRANA
Larguar: F. Olaki, M. Kagere
Afruar: Gj. Muzaka, J. Sefa, K. Ristevski, F. Kahata
LAÇI
Larguar: J. Sefa, M. Memelli, E. Llani, M. Bilibashi
Afruar: A. Mitraj, A. Meto, R. Soza, A. Rexhepi, A. Mustafa
FLAMURTARI
Larguar: G. Mici (zyrtarisht), Gj. Muzaka, A. Meto, G. Fortunat, G. Krasniqi, D. Mendez, L. Liçaj, A. Sakaj, G. Lika, Sh. Metaj, H. Begaj
Afruar: A. Hodza, B. Nikoliç, L. Maxhuni, V. Tomiç, A. Pepa
TEUTA
Larguar: F. Hasanbelliu, B. Pepa, Xh. Shabani, B. Krasniqi, F. Bardulla, M. Fall, M. Ulliri
Afruar: J. Brahja, B. Kuli, M. Çota, Sh. Stafa, F. Beqja
VLLAZNIA
Larguar: A. Kruja (zyrtarisht), R. Shala, E. Mehemdoviç, E. Mujkoviç, M. Ciofi, G. Aguirre
Afruar: F. Bardulla
ELBASANI
Larguar: D. Bylykbashi, S. Çela, M. Çota, E. Shazivari, M. Rodrigues, A. Tahirllari
Afruar: A. Çyrbja, B. Veseli, E. Papa
APOLONIA
Larguar: M. Canka, A. Mitraj, D. Dosti, A. Karakaçi, E. Xhafa, B. Erkoçeviç
Afruar: A. Dimo
NDESHJET
Ndeshjet-Java e 19-të
Datë 24 janar 2015
Vllaznia-Kukësi
Laçi-Partizani
Elbasani-Skënderbeu
Tirana-Apolonia
Flamurtari-Teuta
Renditja
Skuadrat Nd Pikë
1. Kukësi 18 38
2. Skënderbeu 18 36
3. Partizani 18 36
4. Tirana 18 35
5. Laçi 18 27
6. Vllaznia 18 23
7. Flamurtari 18 22
8. Teuta 18 16
9. Elbasani 18 9
10. Apolonia 18 9
De Biazi: Jam “martuar” me një shqiptare……dua edhe nënshtetësinë
Një intervistë interesante e trajnerit të Kombëtares Xhani De Biazi me tifozët Kuq e Zi, ku e ka mirëpritur ftesën e këtyre të fundit për t’i zhvilluar një intervistë disi ndryshe. Trajneri nuk ka ngurruar që tu përgjigjet pyetjeve që nga ardhja e tij në Shqipëri e deri tek dëshira e tij më e madhe sa i përket Shqipërisë.
A është dashur shumë mund t’iu bindin për të pranuar ofertën për të marrë drejtimin e Shqipërisë?
Le të themi që ishte një eksperiencë që doja te bëja, ajo e trajnerit të një kombëtareje dhe mundësia e Federatës, më zuri pak në befasi. Në fillim isha pak i pasigurt se ç’ duhej të bëja, por pastaj u hodha në këtë “aventurë” të re me një entuziazëm të madh.
Tifozët shqiptarë ishin më të shumtë në numër në ndeshjen kundër patriotëve të tu në Xhenova, u bëtë xheloz ?
Në Xhenova kemi treguar se për çfarë jemi te afte me një tifozeri fantastike dhe ajo çfarë më ka gëzuar më shumë është këndimi i te dy himneve nga tifozeria jonë. Kemi luajtur në shtëpi. Shumë bukur.
A e ëndërroni Shqipërinë në Europian dhe një stadium i mbushur me tifozë shqiptarë?
Besoj se në rast se arrijmë të kualifikohemi për kampionatin europian, Shqipëria do ishte kombëtarja me më së shumti tifozë në Francë.
A dini ndonjë thirrje të tifozëve kuq e zi në stadium?
Po, tashmë besoj se kuptoj, mbase jo fjalë për fjalë, por sensin e sloganeve që ju këndoni në stadiume: “O sa mirë me qenë shqiptar!” Pastaj, “Shqipëri Etnike!” E ajo që mbase më pëlqen më shumë është: “Xhamadani vija-vija është Kosova është Shqipëria”.
Cila ka qenë ndeshja para të cilës nuk keni mundur te flini?
Fle gjithmonë pak në ditë të qeta, para çdo lloj ndeshjeje fle pak e rimendoj gjithçka që kemi studiuar e rishikoj atë që duhet të bëjmë të nesërmen.
Kush është urimi me i mirë që keni marrë pas një ndeshje?
Për mua gjëja më e bukur është të shoh skuadrën që shkon tek këndi i tifozerisë tonë, sepse e di sa shumë për zemër e kanë të dy palët realizimin e një ëndrre.
Për fund, mund të na e zbuloni një dëshirë tuajën?
Ah…e di çfarë do më pëlqente? Që miku im kryeministër të më jepte “Nënshtetësinë shqiptare”. Do isha me të vërtetë shumë krenar. Tek e fundit jam martuar me një shqiptare… Kombëtaren kuq e zi, ka 3 vite e pak.
FSHF fillon punën për përzgjedhjen e futbollistëve të rinj
Një program i plotë i FSHF merr jetë për futbollistët e rinj e të talentuar të Shqipërisë, ku aktualisht po bëhen grumbullime në qytetet e Durrësit dhe të Tiranës për të fëmijë me vitin e lindjes në 1999. Sektori i Ekipeve Kombëtare në FSHF po e vazhdon këtë trajnim në bazë të programit të detajuar për të zbuluar fëmijë që duhet të investohet në sajë të talentit të tyre. Ky grumbullim do të vazhdojë deri në datën 29 janar, e sot përzgjedhja do të vazhdojë për qytetet e Fierit dhe të Korçës. Specialistët që po i përcjellin me shumë kujdes këta talente janë Altin Lala, Paolo Tramezzani, Xhani De Biazi, Redi Jupi, Bujar Kasmi dhe Xhemal Mustedanagic.
