Zenel Hila, një jetë mes punës dhe medaljeve

136

Progonati, një fshat në zemër të Kurveleshit, ka një histori mbushur plot lavdi nëpër shekuj të cilat janë të regjistruara në memorien dhe kujtimet e njerëzve të pakët të mbetur në këtë fshat sot nga braktisja e tranzicionit, por edhe të progonatasve të shpërndarë anë e kënd Shqipërisë dhe vendeve të botës. Ata kanë marrë me vete traditat, historinë, rrëfenjat dhe bukurinë natyrore të vendit të tyre të lindjes, me dashurinë e pakufishme për ta shpërndarë kudo si virtytin më të vyer dhe medalje të krenarisë së fshatit e komunitetit të tyre. Një gurqoshe e kësaj godine krenarie të këtij fshati është edhe Zenel Hila, të cilin progonatasit e pagëzuan dhe e thërrisnin “xhaxhi”, madje edhe më të moshuarit se vetë Zeneli. Kjo mirënjohje dhe ky respekt vijon edhe sot , ndonëse kanë kaluar 25 vjet nga largimi i tij nga kjo jetë. Kujtohet me mirënjohje dhe respekt sepse njerëz si Zenel Hila janë të rrallë që lënë gjurmë me thjeshtësinë e portretit të tyre, me profilin e tyre si model në postet shoqërore dhe shtetërore që mbajtën gjatë jetës. Progonati, përveç bukurisë magjike që natyra i ka falur, ka dhe një histori të mbushur me trimëri dhe kontribute të mëdha në luftërat e shumta për liri, pavarësi dhe çlirim kombëtar. Zenelin, ndonëse LANÇ-i e gjeti të martuar e me fëmijë, kjo nuk e pengoi të rreshtohej në rreshtat e batalionit partizan të krahinës, i përkrahur fuqishëm edhe nga nëna e tij duke thelluar kështu më tej traditat patriotike të familjes dhe fshatit ku lindi. Qe janari i vitit 1943-it kur vuri bustinën me yllin e kuq partizan dhe tregoi një trimëri dhe devotshmëri, zell dhe energji për zbatimin e detyrave luftarake që i ngarkoheshin. Plagosja në këmbë në luftën e Luzatit do t’i shoqërohej me dhimbje gjithë jetën e tij, por nuk e ligështoi e nuk e pengoi të mbetej shembull i punës e në ballë të saj. Ky zell e ky vetëmohim, përkushtim dhe dashuri për njerëzit dhe vendin i mbeti edhe pas luftës dhe mbeti përherë një person i dalluar e i palodhur. Dhe puna e “xhaxhit” u shpërblye nga shteti me dekorata e vlerësime të shumta si : Medalja e Kujtimit, Medalja e Çlirimit, Medalja e Trimërisë, dy Medalje Pune nga Kuvendi Popullor. Si kryetar i këshillit popullor nga më jetëgjatët në krahinë, plot 18 vjet nga viti 1956- 1971, në kohë të trazuara e të turbullta politike , e karakterizoi dashuria për njerëzit pa zhvilluar luftën e klasave, por urrejtja për kriminelët, vjedhësit dhe njerëzit me vese të shëmtuara e të pështyra njerëzore nuk ju shua gjithë jetës së tij. Pas ardhjes së demokracisë nuk e kurseu përkrahjen për ish të persekutuarit në dhënien e dëshmive dhe dokumentacionin që u kërkohej. Përgjigjja e tij ndaj skeptikëve dhe atyre që vijonin ti shikonin këto shtresa me syrin e armikut , ishte e shkurtër dhe e qartë: “ T’u jepet se u takon. Ne me ta jemi marrë gjithë jetën.” Emri i tij i lavdishëm dhe i respektuar mbeti vetëm në kujtimet e progonatasve dhe njerëzve që e njohën dhe u shërbeu me dashuri dhe drejtësi. Mirë do qe që ndonjëra nga këto vepra në fshat e zonë ta mbanin emrin e tij. Por Zenel Hila i Progonatit nga mbirë si rrënjët e rrapeve aq të shumta e monumentale të këtij fshati. Agron MEMA