Frank Shkreli*/ Demokratja shqiptaro-amerikane Buta Biberaj, ia doli!

276

Nga Frank Shkreli

Është zyrtare! Buta Biberaj – mos qofsha gabim, e para shqiptaro-amerikane, kandidate e njërës prej partive më të mëdha në Amerikë, është zgjedhur dje kryeprokurore në qarkun Loudon (County) të shtetit Virginia, jo larg Washingtonit. Siç kam shkruar javën që shkoi rreth kandidaturës dhe fushatës së saj për këtë post me rëndësi, zgjedhjet u mbajtën dje, të martën me 5 Nëntor, në Virxhinia dhe anë e mbanë Shteteve të Bashkuara.

http://telegraf.al/opinion-2/frank-shkreli-per-nje-kryeprokurore-shqiptaro-amerikane/

Rezultati zyrtar i fitores së Buta Biberajt karshi kundërshtares së saj, kandidates së Partisë Republikane, M, Nicole Wittman, është si më poshtë: 

Commonwealth Attorney

Buta Biberaj – 53684 —M. Nicole Wittman – 51476

Kandidatja e Partisë Demokrate për Kryeprokurore, Buta Biberaj mundi kandidaten e Partisë Republikane Nicole Witman, e cila kishte një përvojë 26-vjeçare – duke siguruar 53,684 vota ose (49,5% të votave të hedhura) në krahasim me kandidaten kundërshtare Witman, e cila mori 51, 476 ose (47.5%) të votave në qarkun Loudon, bazuar në numërimin e 99 për qind të votave të hedhura. Gazeta “Washington Post” citon Buta Biberajn se fitorja e saj dërgon një mesazh të fortë që, “komuniteti kërkon një sistem drejtësie, ndryshe”.

Ajo iu drejtua mbështetësve të saj pas fitores, duke thënë: “Falënderoj të gjithë ata që votuan dhe jam mirënjohëse për besimin që treguat ndaj meje!”.

https://www.facebook.com/Biberaj2019/videos/2140075296293856/

Për Buta Biberajn, e cila jeton në zonën Dulles të qarkut Loudon, afër Washingtonit, kjo ishte hera e parë që ka kandiduar dhe ka bërë fushatë për një zyrë publike, siç është posti i Kryeprokurorit. Ajo është partnere në firmën avokatore Biberaj, Snow &Sinclair. Buta ka të drejtë të argumentojë çështjet ligjore para Gjykatës së Lartë të Shteteve të Bashkuara, si dhe në gjykatat e apelit në shtetet Virginia, Mariland dhe Nju Jork. Buta Biberaj është diplomuar në Universitetin “Xhorxh Mason” dhe diplomën e doktoraturës juridike e ka marrë nga “Antonin Scalia School of Law”.

Kryeprokurorja e zgjedhur Buta Biberaj

Në njoftimin e saj, se pse kishte kërkuar të bëhej kandidatja e Partisë Demokrate për Kryeprokurore, e ka origjinën në nga vendimin e hershëm për t’u bërë avokate, me qëllim për të, “Ndryshuar botën për më mirë”. Votuesit që e mbështetën atë dje, vlerësuan përvojën që Buta ka në fushën e drejtësisë, pasi ajo ka kryesuar qindra raste kriminale dhe civile.

Një prej reagimeve të para ndaj fitores së Buta Biberajt, erdhi nga Suzanna Shkreli, ish-kandidate e Partisë Demokrate për në Kongresin Amerikan, nga shteti Miçigan. Në portalin e saj, Suzanna Shkreli e cilëson fitoren e Buta Biberajn, si një “Moment Historik” për komunitetin tonë shqiptaro-amerikan. “Një urim shumë të MADH Buta Biberajt dhe mbarë familjes Biberaj!”

Suzanna Shkreli, është një tjetër shqiptaro-amerikane edhe ajo me profesion avokate dhe prokurore, e cila, megjithëse nuk mori votat e nevojshme në garën e fundit për në Kongresin Amerikan, ka një të ardhme të mrekullueshme politike në Shtetet e Bashkuara. Shpresojmë që, duke punuar dhe duke u përgatitur, për momentin e duhur dhe për kohën e përshtatshme të rikthimit të saj në skenën politike amerikane.

 Suzanna Shkreli

Në urimin e saj për fitoren e Buta Biberajt, Suzanna Shkreli, shprehet se është, “Shumë krenare për fushatën që zhvilluar dhe për vizionin tuaj për një botë më të drejtë dhe për një sistem juridik më të barabartë. Prokurorët reformistë janë këtu përgjithmonë tani dhe me ta, sigurisht, do të ndodhin edhe ndryshimet në sistemin juridik të kriminalistikës, anë e mbanë Shteteve të Bashkuara”, përfundon mesazhin e saj të urimit Suzanna Shkreli, për fitoren e Buta Biberajt.

Parulla në foton më sipër të Suzzana Shkrelit thotë “Bashkimi bën fuqinë”, ose “Të bashkuar jemi më të fortë”! Modestisht, shpesh kam bërë thirrje që brezat e rinj shqiptaro-amerikanë, të fillojnë të marrin pjesë në proceset politike të Shteteve të Bashkuara, duke kandiduar për poste politike, administrative dhe juridike, të cilitdo nivel qoftë; vendor, shtetëror ose federal, duke filluar, pikërisht, në nivelin vendor, pasi e gjithë politika zhvillohet në nivel vendor – është ky një term që përdoret në Amerikë dhe që i atribohet ish-Kryetarit të Dhomës së Përfaqësuesve të Kongresit Amerikan, Tip O’Neill.

Shumë prej nesh këtu në Amerikë mund të jemi të regjistruar në partinë tonë të preferuar, si republikanë, demokratë ose diçka tjetër. Kjo nuk ka rëndësi! Rëndësi ka që shqiptaro-amerikanët të bashkëpunojnë me njëri tjetrin si individë dhe si komunitet, duke u bërë pjesë aktive e këtij procesi, për të mirën e përbashkët të shqiptarëve këtu dhe në trojet shqiptare. Ashtu që, që komuniteti shqiptaro-amerikan t’i mbështesë deri në fitore, ata kandidatë shqiptaro-amerikanë, të cilët i hyjnë këtij procesi, dhe kandidatët të ndihmojnë njëri tjetrin dhe të ndajnë përvojat e tyre, si shqiptaro-amerikanë, madje edhe në qoftë se u përkasin partive kundërshtare, sepse së bashku, të organizuar më mirë, si shqiptaro-amerikanë, jemi më të fortë!

Përveç fitores së Buta Biberaj, komuniteti shqiptaro-amerikan po tregon gjallërinë e vet edhe në fusha të tjera. Gjithashtu, të martën, më 5 nëntor, në Nju Jork u zhvillua një ceremoni në kuadër të veprimtarive të komunitetit shqiptaro-amerikan në përgatitje për 107 vjetorin e pavarësisë së Shqipërisë. Shoqata “Illyria” ku bëjnë pjesë 150-policë të qytetit të Nju Jorkut -policë me origjinë shqiptare festuan angazhimin e tyre për ruajtjen e rendit dhe të qetësisë në qytetin më të madh të Amerikës. Njëkohësisht, ata shprehën edhe krenarinë e tyre të prejardhjes së tyre si shqiptarë.

Përveç udhëheqësve më të lartë të Policisë së Nju Jorkut, i pranishëm ishte edhe anëtari i Këshillit Bashkiak të Nju Jorkut, shqiptaro-amerikani Mark Gjonaj, i cili me këtë rast i tha “Zërit të Amerikës”: “Nuk ka qytet më të mrekullueshëm dhe nuk ka departament më të mrekullueshëm policie se sa ai i Nju Jorkut. Shqiptarët që shërbejnë në të, kanë një mision fisnik që të mbrojnë këtë qytet. Ata janë pjesë e departamentit më të madh dhe më të vjetër të policisë në këtë shtet. Dhe në të njëjtën kohë shpalosin trashëgiminë tonë. Në gjakun dhe kombësinë tonë, flamuri kuq e zi tregon kush jemi. Por nuk ka ngjyrë më të mirë se sa ajo e uniformës blu që kombinohet me flamurin tonë”, tha Mark Gjonaj.

Sipas të dhënave paraprake, ka edhe të tjerë shqiptaro-amerikanë që kanë konkurruar dhe kanë fituar në disa zona elektorale të rajoneve vendore administrative më të vogla. Kemi pra, plot arsye për optimizëm për një pjesëmarrje më të madhe të shqiptaro-amerikanëve, në të ardhmen, në të gjitha fushat e jetës amerikane. Një arsye e veçantë sot, është fitorja e Buta Biberajt në detyrën e Kryeprokurores në qarkun Loudon County të shtetit Virxhinia, afër kryeqytetit të Shteteve të Bashkuara. Butes dhe mbarë familjes Biberaj urimet më vëllazërore për këtë fitore të merituar, pse jo edhe historike, për komunitetin shqiptaro-amerikan në Shtetet e Bashkuara të Amerikës! Punë të mbarë!

Politikani shqiptaro-amerikan, Z. Mark Gjonaj në ceremoninë e Shoqatës “Illyria” të policëve shqiptaro-amerikanë të martën në Nju Jork, në kuadër të përgatitjeve për 107-vjetorin e pavarësisë së Shqipërisë.

Ish-Drejtor i VOA-s për Euroazinë*