Skandali me gjendjen civile/ 82-vjeçari, shkon të bëjë pasaportën, por i thonë që ka vdekur. Nga 2011 nuk figuron megjithëse ka votuar

709
Sigal

80-vjeçari rezulton i vdekur që prej vitit 2011, në zyrat e postës, gjendjen civile, dhe në polici

Shkon të bëjë kartën e identitetit, i thonë që ka vdekur

Një rast i pazakontë dhe në të njëjtën kohë skandaloz është raportuar në Orikum të Vlorës ku qytetari 83-vjeçar Selim Hodo, ka rrëfyer në emisionin “Stop” se shkoi në gjendjen civile për të aplikuar për një kartë të re identiteti, por përgjigja që mori nga punonjësit e institucionit ishte, se ai kishte vdekur që në vitin 2011. Sigurisht që ngatërresa të tilla mund të ndodhin për gabime e pasaktësi proceduriale, mirëpo motivi që e bën këtë rast të rëndë e skandaloz për administratën shtetërore është se i moshuari rezulton i vdekur edhe në zyrat e postës dhe në polici. “Vajta në gjendjen civile të Orikumit për të nxjerrë kartën e identitetit, sepse më skadonte dhe më thanë se nuk je i gjallë. Si nuk jam i gjallë? ‘Nuk je i gjallë’. Ika pastaj nga aty, u largova.”- rrëfen Selim Hodo, i cili thotë se e njëjta gjë ndodhi edhe në institucione të tjera. “Erdha në postë, këtu në Vlorë. Një nga ato gratë aty më thotë sille pak kartën. E futi në kompjuter, më thotë ‘je i vdekur’. I them qysh do bëjmë për këtë punë? ‘Do shkosh në polici’. Shkoj në polici dhe i them kështu është puna. ‘Më sill kartën’ më tha ajo, futi numrin dhe më tha se isha i vdekur.”, sipas Certifikatës së vdekjes të qytetari gjallë e shëndoshë, rezulton se ai është ndarë nga jeta, në 9 mars 2011. 83-vjeçari deklaroi se ka nevojë për kartën, pasi pa ata s’mund të marrë asnjë shërbim. Selim Hodo ka lindur, më 15 Janar 1937 dhe rezulton të ketë vdekur, më 9 Mars 2011. Emisioni investigativ “Stop” iu drejtua zyrave të gjendjes civile në qytetin e Orikumit për të pyetur se çfarë ka ndodhur realisht.

Dorjana Hibro, punonjëse e gjendjen civile, Orikum: Zotëria është paraqitur në zyrën e aplikimit Vlorë, nuk e di a ju ka sqaruar apo jo, për të aplikuar për kartë identiteti dhe nuk del fare si emër në momentin që është i çregjistruar. Në këtë rast ka ndodhur një gabim, sepse në të njëjtin vit për bashkëshorten, d.m.th. data e vdekjes që ka zotëria është në fakt data e vdekjes së zonjës dhe është mbajtur gabimisht akti i vdekjes në emër të zotërisë.

Gazetarja: Ideja është e tillë, i gjithë gabimi ka ardhur ndoshta nga një pakujdesi e ish-punonjëses suaj.

Dorjana Hibro: Po, pakujdesi është. Ndodhin gabime të tilla. Këto mund t’i ndodhin kujtdo që është punonjës.

Gazetarja: Gjyshi është 83 vjeç, janë edhe problemet e moshës, do të shkojë të bëjë një kontroll të detajuar jashtë tek djali, ai nuk mund të lëvizë. Ose nesër pasnesër mund të ngrihen këta të institutit dhe të kërkojnë mbrapsht gjithë pensionin. Sepse i bie që vërtetë ta ketë marrë kot, sepse ka vdekur në 2011-n. Po t’i hysh thellë-thellë, janë një sërë problematikash me të cilat ndeshet gjyshi.

Dorjana Hibro: Unë në fakt i kam hyrë shumë thellë dhe i di problematikat. Unë të gjitha masat e duhura i kam marrë. Të ishe ti në vendin tim punonjëse, unë kam bërë maksimumin, si të isha jo thjeshtë një punonjëse, por si njeriu i gjyshit. Është çështje institucionale që besoj që është çështje ditësh vonesa.

Në gjendjen civile të Vlorës shpjegojnë se të dhënat e Selim Hodos do të çohen në drejtorinë e përgjithshme të gjendjes civile, ku do të përballen me informacionet në sistem e për pak ditë, do të marrë zgjidhje ky problem.

Punonjësja: Problemi është shumë i zgjidhshëm, thjeshtë zotëria, as punonjësja nuk ka dijeni, sepse punonjësja nuk i kontrollon dot të gjitha, në moment, që ka ardhur ID-ja, aty shikohet. Nga momenti, që zotëria ka vajtur, për të paraqitur kërkesën, kjo gjë do zgjidhet.

Gazetarja: Do zgjidhet! Të gjithë thonë do zgjidhet. Çështja është, kur do zgjidhet?

Punonjësja: Problemi është se…, ti nëse nuk do zgjidhet dhe ne do thoshim, se nuk ka zgjidhje, atëherë ka problem. Kjo është e zgjidhshme.

Gazetarja: Është e zgjidhshme, por ka një muaj e gjysmë, më kupton? Se të gjithë të përcjellin me fjalë të mira. Gjyshi ka nevojë, duke qenë se është 83 vjeç, ka nevojë të marrë një kurim jashtë shtetit. Tani automatikisht i duhet mjeti i identifikimit, se nuk e lë njeri të kalojë në kufi. Të gjithë të përcjellin, po…po. Tani a do bëhet? Kur do bëhet?

Punonjësja: Të lutem! Këto janë probleme me siguri shumë të lartë! Janë probleme.., nuk janë probleme të thjeshta, që mund të zgjidhen menjëherë. Janë probleme, që janë komisione me juristë, që shikojnë, sepse që të japësh.., t’i japësh një numër identiteti një personi, duhet të bindesh mirë!