Fermerët në protesta: Ulën çmimin në marrëveshje me njëri-tjetrin
Fabrikat pazare me njëri tjetrin kundër fermerëve
(Rëndohet me 14% zgjedha tatimore për prodhuesit e qumështit)
Fermerët në hall. Pozicionohen kundër fabrikave. Së shpejti
paralajmërojnë protesta përpara fabrikave të përpunimit të qumështit.
Fermerët thonë se vendimi i qeverisë për rimbursim të qumështit me 10 lekë për
litër nuk e zgjidh problemin. “Vendimin qeveria e mori, por ne kemi ndeshur
shumë keq me pikat e grumbullimit të qumështit, sepse na e kanë çuar çmimin 37
lekë, nga 47 lekë që ishte. Vendimi nuk ndryshon asnjë gjë, sepse ato 10 lekët
kur t’i marrim, po i morëm… Se vit për vit na kanë premtuar, por kot. Kompanitë
Erzeni, Lufra, Soal e të tjerë kanë bërë pakt me njëri-tjetrin që mos të
grumbullojnë qumësht më lart se 37 lekë”- thotë për Gazetën “Si” Altin Kaja,
fermer në Vajkan të Fierit. Altini tregon se disa fermerë janë në bisedime me
njëri-tjetrin për t’u grumbulluar përpara fabrikave të përpunimit të qumështit
për të protestuar. “Fabrikat e arritën qëllimin e tyre. Ata e ulën 10 lekë
përnjëherë çmimin. Gjithë kjo situatë krijohet për të na mërzitur ne, me qëllim
që të sjellin qumësht pluhur nga importi. Nuk mund të vendosë shteti një çmim
tavan dhe dysheme për qumështin. Mos t’i zhdoganojë botet e qumështit që vijnë
nga Maqedonia”- argumenton Altini. Ai thotë se është përpjekur të komunikojë si
me ministrin e Bujqësisë Bledi Çuçin, po ashtu edhe me kryeministrin Rama, por
nuk ka marrë asnjë përgjigje
Kreu i ALFI-t (Albanian Food Industry) e sheh vendimin e qeverisë për
rimbursimin e fermerëve si një reflektim i përgjegjshëm për një ndërmarrje të
pakonsultuar paraprakisht. Zusi tha për gazetën “Si” se “Në kuadër të shuarjes
së një tensioni të një situate emergjente siç është ajo e sektorit të qumështit,
është për tu përshëndetur.
Por vendimi i djeshëm nuk është zgjidhja e problemit. Ne do ta konsideronim si
hapin e parë të zgjidhjes së problemit drejt një dialogu mes grupeve të
interesit të sektorit të bujqësisë dhe qeverisë për një politikë të
qëndrueshme, parimore për të gjithë sektorin. Kjo vendimmarrje i përzien;
problemet fiskale me ato të nxitjes.” Ish-Ministri i Bujqësisë Edmond Panariti
shkruan në llogarinë e tij në Facebook për çështjen e fermerëve se “Në
Bashkimin Evropian, prodhuesit e qumështit e gjunjëzuan politikën, ndërsa te ne
politika gjunjëzon prodhimin dhe prodhuesit e qumështit!Prodhuesit e vegjël te
qumështit në Bashkimin Evropian, me protestat e tyre të pandalshme detyruan
vendimmarrjen e BE-së të rishihte mekanizmat rregullatore, fiskale dhe
financiare në mbështetje të fermave të qumështit. Në vijim u hoqën pengesat, u
lehtësua barra, u rrit pagesa për çdo litër. Kështu u administrua me sukses
kriza e madhe e qumështit e tre viteve më parë. Fermat u mbajtën më këmbë!. Po
te ne? Te ne ndodh e kundërta! Shkurtohen paratë, hiqen pagesat dhe rëndohet me
14 për qind zgjedha tatimore për prodhuesit e qumështit! Në Mbledhjen e
Këshillit të Ministrave një ditë më parë u vendos që fermerët të rimbursohen
drejtpërdrejtë me 10 lekë për çdo litër qumësht të shitur.. Sipas këtij vendimi
fermerët do të përfitojnë një kompensim 100 lekë të vjetra për litër qumështi
të shitur”, është shprehur Ministri i Bujqësisë Bledi Çuçi. Ai informoi se
aplikimi fillon në datën 22 prill dhe kostoja për fermerët do të jetë zero.
“Për të përfituar nga kjo mbështetje fermerët duhet të dorëzojnë pranë AZHBR-së
vetëm faturën tatimore të shitjes së qumështit në pikat e përpunimit. Aplikimet
fillojnë pranë zyrave bujqësore në qarqe. Ato do të jenë me kosto zero për
fermerët. Është një reagim në kohën e duhur pas ndryshimit të kompensimit të
TVSH nga 20% në 6%”, sqaroi ai.
Por fermerët dhe përfaqësuesit e tjerë të sektorit nuk e shohin këtë vendim si
zgjidhje të problemit. Përpos të tjerave sektori i fruta – perimeve nuk është
marrë në konsideratë.