Ministria e
Drejtësisë ndalon përmbaruesit për pronarët e pa hipotekuar
Ministria e
Drejtësisë ka nxjerrë një udhëzim në lidhje me procedurat e ekzekutimit nga
përmbarimi për pronat që nuk kanë hipotekë, por janë blerë me kontrata
sipërmarrjeje/porosie. Për të hyrë në fuqi do të duhet të pritet botimi në
Fletoren Zyrtare. Por, përmbaruesit sqarojnë se ky udhëzim, nuk bën gjë tjetër
veçse përforcon një vendim të Gjykatës së Lartë të dhënë në vitin 2013, i cili
njeh si pronarë të pasurive të patundshme edhe ata shtetas që nuk e kanë
regjistruar pronën në hipotekë, por për të cilën kanë një kontratë
sipërmarrjeje/porosie. Ministria e Drejtësisë sqaron në lidhje me këtë udhëzim
se ajo i referohet shqetësimit qytetar, të cilët ndonëse kanë porositur banesa,
pra de facto i kanë blerë ato, por ende nuk i kanë regjistruar në ZRPP, ndihen
“të kërcënuar” nga shërbimi përmbarimor për shkak se ndërtuesit e objekteve
mund të zhyten në borxhe, falimentojnë, nuk paguajnë kredinë ose kanë probleme
me tatimet. Përmbaruesit, sqarojnë se ky udhëzim, në praktikë mund të
përkthehet kështu: “ Nëse një shoqëri ndërtimi ka një borxh të caktuar, të
cilin nuk e ka shlyer dhe në lojë futet shërbimi i përmbarimit, ky i fundit nuk
do të mund të sekuestrojë apartamente që rezultojnë të blera me kontratë
sipërmarrjeje dhe nuk janë të hipotekuara. Pra, për borxhet e shoqërisë së
ndërtimit nuk mund të penalizohet qytetari i cili me ligj quhet pronar edhe pse
nuk ke ka të regjistruar pronën në hipotekë”. Udhëzimi, sipas Ministrisë së
Drejtësisë ka vetëm një kusht, që personi, pra familjari, qytetari duhet të
tregoj që ka shlyer këstet e pagesave, qoftë dhe një këst të vetëm. “Pallatet e
ndërtuara me leje ndërtimi por që gjatë procesit të ndërtimit apartamentet janë
kaluar tek qytetarët me kontratë sipërmarrjeje, me kontratë porosie ose me
kontratë premtim – shitje, por që ende nuk janë regjistruar në Zyrën e
Regjistrimit të Pasurisë, sipas këtij udhëzimi do të thotë që konsiderohen të
mbrojtura, që do të thotë shërbimi përmbarimor, privat ose publik, kushdo qoftë,
nuk mund të sekuestrojë apartamentin e askujt që e ka ende me kontratë
sipërmarrje, me kontratë porosie ose me kontratë premtim – shitje”, bën të
ditur ministri Manjani. Për sa i takon pjesës tjetër, sqarohet se kur
ndërtuesit nuk kanë paguar kredinë ose janë debitor tek tatimet apo diku
tjetër, i ftoj të mendojnë dhe të reflektojnë që paratë që kanë borxh, t’i
paguajnë qindarkë më qindarkë. Asnjë mbrojtje për ndërtuesit! Kur kanë shkuar
tek dera e bankës për të marrë kredi e kanë llogaritur që do ta shlyejnë.
Udhëzimi im mbron djersën e ballit që nxjerrin qytetarët shqiptar për të blerë
banesat e tyre, këto banesa janë të mbrojtura, por kurrësesi nuk është qëllim
që të mbrojmë ata që nuk paguajnë detyrimet. Pra shërbimi përmbarimor, ka fuqi
të plotë ligjore, të “gjurmoj” ku ka pasuri të luajtshme apo të paluajtshme,
cilindo ndërtues që ka borxhe për të shlyer por jo në kurriz të atyre
qytetarëve, të cilët kanë paguar shtëpitë e tyre por që për arsye proceduriale,
burokratike apo po të doni ju dhe korruptive, ende nuk janë regjistruar në
Zyrën e Regjistrimit të Pasurisë. Kjo është e mbrojtur, tashmë edhe me
udhëzim”. Për Ministrinë e Drejtësisë qytetarët kur bëjnë blerje të pasurive të
paluajtshme duhet t’u drejtohen noterëve. Tashmë me ligj, noteri përpara se të
bëj një shitje të pasurisë së paluajtshme, do të duhet të verifikoj
paraprakisht në Zyrën e Regjistrimit të Pasurisë, lejen e ndërtimit, sepse
lejet e ndërtimit tashmë regjistrohen në ZRPP, pa filluar pallati ende. Bashkia
jep lejen e ndërtimit dhe ja çon automatikisht ZRPP-së ose hipotekës dhe ajo e
njofton noterin. Vetëm pas këtij çasti noteri jep garanci që banesa mund të
shitet, mund të jepet me sipërmarrje apo me premtim – shitje, apo me çfarëdo
forme ligjore. Pra, çdo qytetar i Republikës së Shqipërisë që do të blejë nëj
pasuri të paluajtshme, duhet ta bëjë këtë vetëm në zyrën e noterit. Ai duhet të
ketë me vete dokumentin e identitetit, të cilin duhet ta aktivizojnë me
nënshkrimin elektronik. Në qoftë se dokumenti noterial i blerjes bëhet që në
fillim tek zyra e noterit, transaksioni është 100 % i sigurt, në qoftë se
blerja bëhet jashtë zyrës së noterit, shteti nuk ka më asnjë përgjegjësi dhe
nuk garanton më askënd.
