Xhaçka pas akuzave të opozitës: Përtej llafeve po ndihmojmë çdo banor

121
Ministrja e Mbrojtjes Olta Xhaçka ka reaguar pas akuzave të shumta të opozitës se nuk po bëhet sa duhet për banorët e Shkodrës, shtëpitë e të cilëve janë përmbytur nga reshjet e shumta. Ministrja Xhaçka: “Në Shkodër vazhdojmë të jemi në këmbë 24 orë në 24, që prej minutës së parë. Kudo ku uji ka paralizuar jetën e njerëzve, në Obot, Dajç, Ana e Malit, Trush, Livadhë, Velipojë apo Bushat, që prej 5 Marsit e deri më sot, mbi 600 djem në uniformë, qindra të tjerë të Emergjencave Civile, Ndërhyrjes së Shpejtë dhe OSHEE kanë qenë dhe vazhdojnë të jenë pranë çdo banori në vështirësi. Kushdo që thotë se, ushtria nuk e njeh terrenin mirë, me siguri ka shkuar vetëm në ato zona ku e gërryen meraku për militantët. Për ne, banorët e Shkodrës janë qytetarë të Shqipërisë! Nga Ministria e Mbrojtjes dhe Rezervat e Shtetit janë shpërndarë mbi 30 mijë kg ushqime e detergjente, 23 mijë litra ujë e më shumë se 53 mijë kg koncentrat. 300 ton koncentrat e qindra ton ujë pritet të shpërndahen ditë pas dite. Nga Rezervat e Shtetit janë shpërndarë pako ushqimore, shtretër, çadra, batanije e çizme për banorët në vështirësi. I bëjmë thirrje pushtetit vendor dhe administratorëve lokalë, të lënë llafet e propagandën boshe të politikës ndarëse të ditës, dhe të marrin masat për koordinimin e shpërndarjes, në bazë të nevojave, pa dallim, për të gjithë banorët në zonat e rrethuara nga uji. Forcat e Armatosura po punojnë natë e ditë për shpërndarjen e ndihmave, sipas planifikimit të Komisionit të Emergjencave përmes Prefekturës dhe strukturave vendore. Bashkëpunimi mes forcave të ushtrisë, institucioneve të qeverisë dhe pushtetit vendor është detyrimi ynë i përbashkët, dhe vendosja e qytetarëve në qendër të përpjekjeve të përbashkëta, është nderi i çdokujt që paguhet nga taksat e tyre!,” shkruhet në reagim e ministres Xhaçka