“Vullnetin e lirë të qytetarëve nuk e pengon dot askush” , Nasip Naço fton Ministren Felaj në mitingun e LSI

47
Ish Ministri i Ekonomisë, Nasip Naço me anë të një postimi në rrjetin social “Facebook” ka cilësuar si shkelje blatante që dënohet me ligj presionin që bëhet ndaj qytetarëve dhe mbështetësve të LSI me mesazhe në telefonat celularë. Në foton e postuar nga Naço, siç shprehet dhe ai në postim evidentohet qartë numri celular i ministres në detyrë Ermonela Felaj. Plotësimi i këtij formulari përfshin deklarimin e numrit personal të kartës së identitetit. Naço përfundon reagimin e tij me një ftesë drejtuar Ministres Felaj në mitingun përmbyllës të LSI në Kuçovë duke thënë se ky miting do e ndihmojë atë të ndërgjegjësohet me shpirtin e vërtetë të popullit. 

“Ushtrimin e vullnetit të lirë të qytetarëve për ta mbështetur LSI në formën që ata e cilësojnë më oportune, nuk mund ta frenojë askush. Edhe në rastin kur bëhet fjalë për plotësimin e një formulari që përfshin deklarimin pa asnjë detyrim të numrit të kartës së identitetit.
Një veprim i tillë nuk përbën asnjë shkelje të ligjit, por përkundrazi guximi i tepruar i një Ministre Shteti në detyrë sikurse z. Ermonela Felaj që kërcënon votuesit, përveçse nuk ka asnjë moral, përbën edhe vepër penale.
Znj. Ministreshë, formën po ta falim, (e kam fjalën për mungesën e njohurive të theksuara në drejtshkrim) por përmbajtjen është e patolerueshme të ta pranojmë.
Për të gjithë të interesuarit, përmes kësaj fotoje (ku evidentohet numri i telefonit të Ministres Felaj) po mundësojmë përcjelljen e shqetësimit qytetar, si dhe pasojës ligjore që mbart ky komunikim sipas legjislacionit në fuqi.
Në Kodin Penal citoj parashikimin se:
“Kërcënimi ose ngacmimi i personit me anën e veprimeve të përsëritura, me qëllimin për t’i shkaktuar një gjendje të vazhdueshme dhe të rëndë ankthi apo frike për sigurinë vetjake, të një të afërmi ose të një personi, me të cilin ka lidhje shpirtërore, apo për ta detyruar të ndryshojë mënyrën e tij të jetesës, dënohet me burgim nga gjashtë muaj gjer në katër vjet”.
E nderuara Ministreshë, të ftojmë të reflektosh lidhur me komunikimin aspak njerëzor që shfaq hapur, nga i cili nuk ke kursyer as bashkëpunëtorët e tu më të afërt…
Ndërkohë, uroj të pranosh ftesën time publike për të qenë nesër e pranishme në mitingun përmbyllës në Kuçovë, i cili do të të ndihmojë shumë të ndërgjegjësohesh lidhur me vullnetin e vërtetë të popullit këtu.
P.S Rasti në fjalë është shënuar në Kuçovë.”