Rruga në Bashkimin Evropian çon edhe përmes përcaktimit të qartë të kufijve tanë, tha presidenti i Serbisë, Aleksandar Vuçiç.
Duke folur për mediet serbe në lidhje me euro-integrimet, Vuçiç tha se Serbisë “nuk do t’i lejohet hyrja në BE pa zgjidhje të qartë të çështjes së kufijve”.
“Kur do ta zgjidhim, është çështje tjetër. A duam ta zgjidhim ose jo? Populli do të duhet të thotë në një referendum se çfarë mendon”, tha Vuçiç.
Ai vuri në dukje se ambasadori i ri i Francës në Beograd i ka thënë atë që është e njohur – se Serbia do të duhej të bëjë marrëveshje ligjërisht të detyrueshme me Kosovën, e cila parashikon zgjidhje të çështjes së kufirit.
Vuçiç tha se konfliktet me shqiptarët “nuk kanë shanse dhe lumturi”.
Serbia, me Kushtetutë, e konsideron ende Kosovën pjesë të saj.
