Gjermania mban premtimin për të mbështetur përpjekjet e të gjitha vendeve të Evropës Juglindore dhe perspektivën e tyre për integrim
Christian Hellbach, Drejtor për Evropën Jug-Lindore në Ministrinë e Jashtme të Gjermanisë, në një intervistë për DW, ka folur për rastin e ish- ministrit Saimir Tahiri si i dyshuar për lidhjet me grupet e trafikut të drogës. Ndër të tjera ai tha, se një nga detyrat kryesore të Shqipërisë, në kuadër të përafrimit me BE-në, është lufta pa kompromis kundër krimit të organizuar dhe korrupsionit. “Për këtë arsye do të nevojitej konsolidimi i organeve ligj-zbatuese në aktivitetin e tyre si edhe procese të ndjekjes penale, pavarësisht personit. Po kështu nuk duhet të abuzohet me imunitetin parlamentar për të mbrojtur të mandatuarit prej aksesit të drejtësisë”, deklaroi ai.
A e mbështet Gjermania ambicien e Shqipërisë për të hapur negociatat e anëtarësimit vitin e ardhshëm?
Christian Hellbach: Gjermania i qëndron premtimit, që të gjitha vendet e Evropës Juglindore kanë perspektivën e integrimit dhe ne i mbështesim ata në përpjekjet e tyre për të realizuar reformat e nevojshme. Kriteret për çeljen e bisedimeve të anëtarësimit janë të njohura. Tani është në dorën e Shqipërisë të arrijë progresin e kërkuar në pesë prioritetet kyçe. Një hap shumë i rëndësishëm është reforma në drejtësi dhe ngritja tashmë e përfunduar e komisioneve të vetingut. Ne presim me shumë interes punën e tyre dhe do t’i vëzhgojmë imtësisht. Sukses presim gjithashtu të arrihet edhe në luftën kundër krimit të organizuar dhe korrupsionit.
Si e komentoni situatën aktuale politike në Shqipëri? Investigimin për korrupsion dhe lidhje me grupet e trafikut të drogës të ish-ministrit të Brendshëm dhe dorëheqjen e drejtorit të shërbimeve sekrete?
Më lejoni t’i përgjigjem në parim kësaj pyetjeje: një nga detyrat thelbësore të Shqipërisë në kuadër të përafrimit me BE-në është lufta pa kompromis kundër krimit të organizuar dhe korrupsionit. Për këtë arsye do të nevojitej konsolidimi i organeve ligj-zbatuese në aktivitetin e tyre si edhe procese të ndjekjes penale pavarësisht personit. Po kështu nuk duhet të abuzohet me imunitetin parlamentar për të mbrojtur të mandatuarit prej aksesit të drejtësisë, nëse ka mjaftueshëm momente konkrete dyshimi. Ky është një imperativ i shtetit ligjor.
