Edhe pse nuk është pjese e autoritetit për informimin me dokumentet e ish sigurimit të shtetit, pasi mazhoranca refuzoi kandidaturën e mbështetur prej tyre,Partia Demokratike do ta ndjek nga afër këtë proces.
Nënkryetari Edmond Spaho, thotë puna e autoritetit lidhet me dy çështje thelbësore, hapjen e dosjeve të komunizmit dhe reformën në drejtësi, ndaj ai garantoi se nuk do lejojë mazhorancën të kapë këtë proces.
Spaho: Ne nuk mund të rrimë indiferent ndaj vetë procesit të hapjes së dosjeve dhe ngritjes së sistemit të ri të drejtësisë. Pra, do të synojmë që të mos lejojmë kapjen e tij. Një nga dyert ku do të kalohet edhe kjo e Autoritetit.
Nënkryetari i Partisë Demokratike jep dy arsye pse kandidati i tyre u refuzua nga mazhoranca.
Spaho: Në procesin e hapjes së dosjeve ka dëshira, tendenca, përpjekje për fshehjen e të shkuarës nga individë të caktuar, të cilët kanë luajtur rol në persekutimin e qytetarëve në atë periudhë. Së dyti, në procesin e Vettingut është vënë një klauzolë ku të gjithë ata që do të jenë pjesë e dy organizmave që do të bëjnë verifikimin do të kalojnë më përpara për t’u verifikuar në komisionin e hapjes së dosjeve.
Edmond Spaho, paralajmëron se me rikthimin në pushtet, Partia Demokratike do të ndërhyjë në këtë autoritet për të garantuar përfaqësimin e të djathtës, e mohuar sipas tij nga mazhoranca në kundërshtim me ligjin.
