Skandali i FSDKSH/ Farmacitë e lidhura me ish-drejtuesit e Fondit rimbursonin receta të falsifikuara ilaçesh, për të vdekurit

1178
Sigal

Farmacitë e lidhura me ish-drejtues të Fondit nën akuzë për mashtrim

Ish-drejtues të FSDKSH kanë farmacitë që akuzohen nga prokuroria për mashtrim

Drejtoreshat e dështuara të FSDKSH-së emërohen ministre

Drejtoreshat e FSDKSH-së, edhe pse dështon skema e rimbursimit të ilaçeve, edhe pse disa farmaci të drejtuesve drejtuesve të FSDKSH-së zbatojnë skema korruptive, duke zhvatur dhjetëra milionë euro, disa herë janë emëruar ministre nga kryeministri Rama, në vend që prokuroria të hetonte për përgjegjësitë e tyre. Kështu, drejtoresha e FSDKSH, Milva Ekonomi emërohet ministre e Ekonomisë, në 2016-n, ndërsa para disa javësh Anila Denaj, drejtoresha e FSDKSH-së emërohet ministre e Financave dhe Ekonomisë. Ndërkohë, që korrupsioni me zbatimin e skemave korruptive të rimbursimit të ilaçeve, madje nga farmaci që janë të drejtuesve të FSDKSH-së i shkakton buxhetit dhjetëra milionë euro, ndërkohë që pacientët mbeten pa ilaçe. Gjithashtu, në skemën e rimbursimit të ilaçeve, zakonisht vihen ato ilaçe, që kanë një çmim qesharak, të atyre ilaçeve që prodhohen jashtë BE-së dhe jashtë standardeve evropiane, të cilat nuk kanë efektin e duhur kurues, por mbushin xhepin e atyre që kanë monopolin e shitjes së tyre në tregun shqiptar. Shumë herë ilaçet e rimbursuara nuk gjenden në treg dhe në spitalet publike, ose vijnë me vonesë, duke detyruar pacientët që t’i blejnë ilaçet me paratë e tyre.

Receta të rimbursueshme për të …vdekurit

Prokuroria e Tiranës lëshoi urdhër-arreste për Gazmend Aliajn dhe Petrit Skurën pas akuzave të ngritura për mashtrim me ilaçet e rimbursueshme përmes recetave të falsifikuara në emër të personave të vdekur apo atyre që jetojnë jashtë Shqipërisë. Një rrjet farmacish të lidhura me ish-drejtues të Fondit të Sigurimit të Detyrueshëm të Kujdesit Shëndetësor janë vënë nën akuzë për mashtrim me rimbursimet përmes recetave të falsifikuara në emër të personave të vdekur ose atyre që jetojnë jashtë Shqipërisë. Prokuroria e Tiranës njoftoi të premten se pjesë e skemës së dyshuar të mashtrimit janë farmacitë “Bioplus” dhe “Medigreen” në pronësinë e Gazmend Aliajt si dhe farmacia “Geni&Lori” në pronësinë e Loranda Skurës. Prokuroria e Tiranës njoftoi gjithashtu se kishte lëshuar urdhër-arreste për Petrit Skurën dhe Gazmend Aliajn. Megjithatë, urdhër-arrestet nuk janë ekzekutuar ende, pasi asnjëri prej tyre nuk është gjetur në vend-banesë nga policia. Procedimi penal për skemën e mashtrimit me ilaçet e rimbursueshme u regjistrua, në qershor të 2018-s me akuzën e “shpërdorimit të detyrës”. Prokurori Ervin Karanxha tha se policia e Tiranës kishte bërë një referim të dytë në Prokurori, në nëntorin e 2018-s, që ekspozonte një rrjet farmacish në pronësi të familjarëve të drejtuesve të Fondit, të cilat kishin përfituar shuma marramendëse rimbursimi përgjatë 10 viteve të fundit. “Nga hetimet e kryera na ka rezultuar se farmacitë e mësipërme kanë lëshuar receta dhe kanë përfituar rimbursime në emër të personave të vdekur apo të personave që jetojnë jashtë Shqipërisë,” tha prokurori Karanxha. “Pjesë e këtij procedimi janë edhe persona të tjerë, të cilët po hetohen në gjendje të lirë,” shtoi prokurori. BIRN mësoi, se vetëm për një periudhë 5-mujore, farmacitë e mësipërme kanë rimbursuar receta për rreth 400 persona në kundërshtim me ligjin, ndërkohë që vlera e rimbursimit për çdo recetë varionte deri në 30 mijë lekë. “…Janë pajisur me recetë në mënyrë te përsëritur nga 2 deri në 5 herë shtetas të cilët kanë qenë të vdekur. Konkretisht rezulton se ndodhen 79 receta të rimbursuara dhe 35 shtetas/ pacientë, të cilët janë pajisur me ilaçe disa herë, ndonëse këta persona rezultojnë të vdekur në regjistrin e gjendjes civile,” tha Prokuroria. Verifikime janë kryer edhe përmes sistemit TIMS, të cilat kanë zbuluar se receta fiktive janë lëshuar edhe në emër të personave që nuk jetojnë në Shqipëri. Në një investigim të botuar në nëntor 2018, BIRN zbuloi se një rrjet farmacish të hetuara më parë për mashtrim me subvencionet dhe në pronësi të familjarëve të ish-drejtuesve të Fondit kryesonin listën e rimbursimeve të ilaçeve në dhjetë vitet e fundit, duke ngritur dyshime për favorizim dhe konflikt interesi. Farmacitë “Bioplus”,”Medigreen” dhe “Geni& Lori” janë pjesë e këtij rrjeti farmacish. Petrit Skura është babai i ish-nëndrejtorit të FDSKSH, Sokol Skura, ndërsa Gazmend Aliaj është kunati i drejtorit të Politikave në Fond, Aleksandër Haxhi. Përpara se të bëheshin pronarë farmacish, Sokol Skura dhe Gazmend Aliaj kanë punuar si kontrollorë në drejtorinë e Fondit për Tiranën. Të dhënat e analizuara nga BIRN tregojnë se nga viti 2010 deri në prill të vitit 2018, FSDKSH shpenzoi 48.8 miliardë lekë [390.8 milionë euro] për rimbursimin e ilaçeve, fond nga i cili përfituan rreth 850 subjekte farmaceutike. Nga kjo listë, një grup prej 24 subjektesh, që përbëjnë 2.8 % të farmacive me kontratë në vend kanë përfituar 9.4 % të fondit ose 36.6 milionë euro nga viti 2010 deri në prill 2018. Lista e subjekteve përfituese udhëhiqej nga një grusht farmacish të lidhura me drejtorin e politikave në Fond, Aleksandër Haxhi dhe kunatin e tij Gazmend Aliaj, si dhe ish- nëndrejtorin e FSDKSH-së, Sokol Skura. Gjatë dekadës së fundit, bashkëshortët Aliaj nëpërmjet farmacive Nikol 1, Nikol 2, Nikol 2 –IRA, Bio Plus dhe Medigreen kanë qenë farmacistët me rekordin më të lartë të rimbursimeve, duke arkëtuar 974 milionë lekë [7.75 milionë euro] nga FSDKSH. Farmacitë e lidhura me ish- nëndrejtorin e fondit, Sokol Skura renditen në vend të dytë. Përveç farmacisë Geni&Lori, që është në pronësi të kunatës së tij, Loranda Skura, Sokol Skura ka në pronësi farmacitë Coli’s dhe Eurofam2. Në total gjatë 8 viteve të fundit, tre farmacitë në pronësi të familjes Skura – Geni&Lori, Eurofam2 dhe Coli’s kanë përfituar 765 milionë [6 milionë euro] lekë rimbursime nga FSDKSH. Në një intervistë për BIRN në nëntor 2018, Sokol Skura ia dedikoi suksesin e farmacive të tij përkushtimit në punë, ndërsa Gazmend Aliaj nuk iu përgjigj një kërkese për intervistë. “Të ardhurat relativisht te mira të dy farmacive të mia justifikohen nga furnizimi i mirë me barna, për të cilat unë tatohem dhe jap të gjitha të dhënat çdo muaj pranë institucioneve përkatëse,” tha Skura. “Jam hetuar nga ILDKPKI, nga hetimi tatimor, nga Fondi kam pasur një kontroll të plotë dhe kam dalë i pastër,” tha ai.